Сурхондарёда президент машина ҳайдаган носоз йўлни таъмирлаш ишлари бошланди

Шавкат Мирзиёев Сурхондарё вилоятига ташрифи давомида ўзи автомобиль бошқариб, Бойсун-Денов йўналишидаги йўллар сифатини танқид қилган эди. Мазкур йўлларни таъмирлаш ишлари бошланди.

Хабарга кўра, Сурхондарё вилоятидаги 4Р-105 Дарбанд–Бойсун–Элбаён автомобиль йўлининг 5-70 километр қисмини ва 4Р-100 Манғузор–Жарқўрғон–Бандихон–Олтинсой–Денов автомобиль йўлининг 128-174 километр қисмини (жами 111 километр) реконструкция қилиш лойиҳаси Осиё тараққиёт банки маблағлари ҳисобидан амалга оширилади.

Лойиҳа доирасида реконструкция қилинадиган автомобиль йўлининг умумий узунлиги 111 километр цементо-бетон қоплама бўлиб, вилоятнинг Бойсун, Бандиҳон, Қумқўрғон, Олтинсой ва Денов туманлари ҳудудидан ўтади. Лойиҳанинг умумий қиймати 227,3 миллион доллар, шундан 183,8 миллион доллар Осиё тараққиёт банки қарз маблағи ва 43,5 миллион доллар Ўзбекистоннинг улуши ҳисобланади.

Лойиҳа доирасида 2022 йил 25 март куни Ўзбекистон ва Осиё тараққиёт банки ўртасида қарз битими имзоланиб, 2022 йил 27 апрелдан кучга кирди. Қурилиш-монтаж ишларини бажарувчи пудратчи ташкилотни аниқлаш бўйича тендер савдолари ўтказилиб, баҳолаш натижалари 2022 йилнинг 11 август куни Соҳавий харидлар комиссиясининг баённомаси билан тасдиқланган ҳамда 2022 йил 8-сентябр куни Осиё тараққиёт банки томонидан маъқулланган.

Ўтказилган тендер натижаларига кўра “Ланкаран Ёл Тикинти” (Озарбайжон) очиқ акциядорлик жамияти жами 147,6 миллион доллар миқдоридаги молиявий таклифлари билан ғолиб пудратчи деб топилди, шунингдек, ғолиб пудратчи компания билан шартномалар 2022 йил 6-октябр куни имзоланиб, ҳозирги кунда пудратчи ташкилот томонидан қурилиш-монтаж ишлари бошлаб юборилди.

Бугунги кунда қурилиш объектида асос ишлари бажарилмоқда. Ҳозирда объектга 70 тадан ортиқ махсус машина ва механизмлар, жумладан, 40 дона автосамосвал, 6 та экскаватор, 5 та каток, 2 та трейлер, 5 та погрузчик, 8 та грейдер, 2 та ёнилғи ташувчи ва 2 та сув ташувчи, шунингдек, 120 нафар ишчи ходимлар жалб қилинган.

Бундан ташқари, 2023 йил март апрель ойларида пудратчи томонидан қўшимча 65 дона махсус техникалар олиб келинади. Лойиҳа доирасида қурилиш ишлари 2024 йил якунига қадар тўлиқ тугатилиши режалаштирилган.