Туркиядаги аср фалокати — 2023 йилнинг 6 февраль куни содир бўлган зилзила оқибатида вафот этганлар 47 минг 475 нафар кишини ташкил қилса, марҳумларнинг 7 нафари ўзбекистонликлар ҳисобланади. Бу ҳақда Туркия Республикасининг Ўзбекистондаги элчиси Олган Бекар ўзбекистонлик журналистлар билан бўлган матбуот анжуманида маълум қилди.
“'Аср фалокати' етти нафар ўзбек қардошимизни ҳам қўшиб ҳисоблаганда 47 475 кишининг ўлимига сабаб бўлди. Халқаро миқёсда кўрсатилган ёрдамларда энг олдинги сафда келган мамлакатлардан бири азалий ва абадий қардошимиз Ўзбекистон давлати бўлди. Ўзбекистон давлати ва халқи тарихда бўлгани сингари бу машъум фалокатдан сўнг ҳам доимги олийжаноблигини намойиш этиб, ўлкамизни ёлғизлатиб қўймади. Даставвал президент Мирзиёев, Вазирлар Маҳкамаси ва давлат ташкилотларининг деярли барча юқори даражали раҳбарлари элчихонамизга ташриф буюриб, таъзия дафтарни имзолаганлари хотирадан ўчмайдиган бирдамлик тимсоли бўлди”, — дейди элчи Олган Бекар.
Элчининг айтишича, Ўзбекистон ҳукумати томонидан 6 февралдан 13 февралгача Адана вилоятига қидирув-қутқарув, тиббиёт жамоалари ҳамда гуманитар ёрдамни ташувчи 6 та алоҳида карго рейси ташкил этилган.
“Бу рейслар орқали давлатимизга етиб борган 100 кишидан иборат Ўзбекистон қидирув-қутқарув жамоаси, Ҳатай вилоятида қутқариш ишларини бажарди. 25 февраль куни Ўзбекистонга қайтган ўзбек қидирув-қутқарув жамоаси қутқарув ишлари давомида 18 кишини вайроналар остидан тирик олиб чиққан бўлса, 190 кишининг жасадини топишга эришди. 8 февраль куни етиб борган 71 кишилик тиббиёт ходимлари эса Ҳатай вилоятида дала госпитали ўрнатиб, 1795 нафар эркак, 1177 аёл ва 888 нафар болага тиббий ёрдам кўрсатди”, — дейди жаноб Олган Бекар.
Қўшимча қилинишича, Ўзбекистон ҳаво йўллари, Турк ҳаво йўллари, МНГ Карго ва юк транспортлари орқали бугунгача Туркияга 674 тонна гуманитар ёрдам етказиб берилган.
“Шу билан бирга молиявий ёрдамлар 'Зираат банк Ўзбекистон' орқали ҳам мамлакатимизга юборилди. Бугунги кунгача 644 минг доллар миқдоридаги нақд маблағ Туркияга ёрдам сифатида юборилди ва маблағлар ҳамон келишда давом этмоқда”, — дейди элчи.
Туркиянинг Ўзбекистондаги элчиси Олган Бекар “Дарё” мухбирининг Туркия давлати зилзиладан жабрланганларга янги уйлар қуриш учун, янги шаҳарлар барпо этиш учун қурилишда тажрибаси бор давлатлар билан ҳамкорлик қилишни режалаштирганми деган саволига Туркия давлатининг қурилиш соҳасида узоқ йиллик тажрибаси борлигини айтиб, зилзиладан сўнг хулоса қилинганини ва энди қурилиши мумкин бўлган уйлар узоқ йиллик тажрибага асосланган ҳолда турк қурувчилари томонидан амалга оширилишини маълум қилди.
Изоҳ (0)