Surxondaryoda prezident mashina haydagan nosoz yo‘lni taʼmirlash ishlari boshlandi

Shavkat Mirziyoyev Surxondaryo viloyatiga tashrifi davomida o‘zi avtomobil boshqarib, Boysun-Denov yo‘nalishidagi yo‘llar sifatini tanqid qilgan edi. Mazkur yo‘llarni taʼmirlash ishlari boshlandi.

Xabarga ko‘ra, Surxondaryo viloyatidagi 4R-105 Darband–Boysun–Elbayon avtomobil yo‘lining 5-70 kilometr qismini va 4R-100 Mang‘uzor–Jarqo‘rg‘on–Bandixon–Oltinsoy–Denov avtomobil yo‘lining 128-174 kilometr qismini (jami 111 kilometr) rekonstruksiya qilish loyihasi Osiyo taraqqiyot banki mablag‘lari hisobidan amalga oshiriladi.

Loyiha doirasida rekonstruksiya qilinadigan avtomobil yo‘lining umumiy uzunligi 111 kilometr semento-beton qoplama bo‘lib, viloyatning Boysun, Bandihon, Qumqo‘rg‘on, Oltinsoy va Denov tumanlari hududidan o‘tadi. Loyihaning umumiy qiymati 227,3 million dollar, shundan 183,8 million dollar Osiyo taraqqiyot banki qarz mablag‘i va 43,5 million dollar O‘zbekistonning ulushi hisoblanadi.

Loyiha doirasida 2022-yil 25-mart kuni O‘zbekiston va Osiyo taraqqiyot banki o‘rtasida qarz bitimi imzolanib, 2022-yil 27-apreldan kuchga kirdi. Qurilish-montaj ishlarini bajaruvchi pudratchi tashkilotni aniqlash bo‘yicha tender savdolari o‘tkazilib, baholash natijalari 2022-yilning 11-avgust kuni Sohaviy xaridlar komissiyasining bayonnomasi bilan tasdiqlangan hamda 2022-yil 8-sentyabr kuni Osiyo taraqqiyot banki tomonidan maʼqullangan.

O‘tkazilgan tender natijalariga ko‘ra “Lankaran Yol Tikinti” (Ozarbayjon) ochiq aksiyadorlik jamiyati jami 147,6 million dollar miqdoridagi moliyaviy takliflari bilan g‘olib pudratchi deb topildi, shuningdek, g‘olib pudratchi kompaniya bilan shartnomalar 2022-yil 6-oktyabr kuni imzolanib, hozirgi kunda pudratchi tashkilot tomonidan qurilish-montaj ishlari boshlab yuborildi.

Bugungi kunda qurilish obyektida asos ishlari bajarilmoqda. Hozirda obyektga 70 tadan ortiq maxsus mashina va mexanizmlar, jumladan, 40 dona avtosamosval, 6 ta ekskavator, 5 ta katok, 2 ta treyler, 5 ta pogruzchik, 8 ta greyder, 2 ta yonilg‘i tashuvchi va 2 ta suv tashuvchi, shuningdek, 120 nafar ishchi xodimlar jalb qilingan.

Bundan tashqari, 2023-yil mart-aprel oylarida pudratchi tomonidan qo‘shimcha 65 dona maxsus texnikalar olib kelinadi. Loyiha doirasida qurilish ishlari 2024-yil yakuniga qadar to‘liq tugatilishi rejalashtirilgan.