Тошкент шаҳрида 14 март куни Рақобатни ривожлантириш ва истеъмолчилар ҳуқуқларини ҳимоя қилиш қўмитаси томонидан “Истеъмолчилар ҳуқуқларини ҳимоя қилиш: муаммо ва ечимлар” мавзусида халқаро конференция ўтказилди. Тадбирда маҳсулотлар рекламаси, молиявий хизматлар бозоридаги мавжуд ҳолат юзасидан фикр алмашилди, деб хабар бермоқда “Дарё” мухбири.
Конференцияда айтилишича, қўмита томонидан 2023 йилнинг ўтган даври мобайнида келиб тушган мурожаатларга асосан жами 3 миллион 259 минг 111 нафар истеъмолчига 75 миллиард 600 миллион 600 минг сўм зарар етказилгани аниқланган. Уларга 60 миллиард сўмдан ортиқ маблағ қайта ҳисоб-китоб қилиниши натижасида 2 миллион 133 минг 721 нафар истеъмолчининг ҳуқуқлари тикланган. Ҳозирда қолган маблағларни истеъмолчиларга қайтариш чоралари кўрилмоқда.
Мурожаатларнинг 10 минг 277 таси (40,1 фоиз) уй-жой коммунал, транспорт хизматлари, 9 минг 596 таси (37,4 фоиз) савдо ва умумий овқатланиш, 4 минг 415 таси (17,2 фоиз) алоқа, молия ва ижтимоий хизматлар ҳамда 1 минг 356 таси (5,3 фоиз) реклама муносабатлари ва бошқа масалаларга тўғри келади.
Товар хавфсизлигини назорат қилиш экспертизалари давомида жами 242 номдаги (50 турдаги) маҳсулотларнинг назорат хариди амалга оширилди. Натижаларга кўра, 51 номдаги (12 турдаги) маҳсулотлар норматив-техник ҳужжатлар талабларига жавоб бермаслиги маълум бўлган. Мисол учун, ички бозордаги L&S кабели бир қатор нормаларга жавоб бермаслиги аниқланиб, тегишли чоралар кўриш учун Қурилиш соҳасида назорат инспекцияси ва Техник жиҳатдан тартибга солиш агентлигига юборилган.
Изоҳ (0)