Ўзбекистон 2023 йилнинг январь ойида хориждан қиймати 13 млн долларга тенг бўлган 389 дона электромобиль импорт қилган. Бу ҳақда Давлат статистика агентлиги хабар бермоқда.
Маълумотларга кўра, январь ойида 6 та мамлакатдан электромобиль олиб келинган.
Электромобиллар импорти 2022 йилнинг мос даври билан солиштирилганда 266 тага ошган. 2022 йилнинг декабрь ойида эса 268 дона электромобиль олиб келинган.
Шунингдек, Ўзбекистон жорий йилнинг январь ойида энг кўп электромобиль импорт қилган давлатлар орасида Хитой етакчилик қилмоқда — 346 дона.
Иккинчи ўринда 29 дона электромобил билан Гонконг қайд этилган бўлса, Германия учинчи бўлган — 8 дона. БААдан эса 3 дона электромобил олиб келинган.
2022 йилда хориждан қиймати 69,8 млн долларга тенг бўлган 2 180 дона электромобиль импорт қилинган эди. Бу 2021 йилдаги кўрсаткичдан 1371 тага кўп.
Аввалроқ Жиззахда электромобиль ишлаб чиқариш йўлга қўйилиши ҳақида хабар берилганди.
Изоҳ (0)