Хитой, Корея ва АҚШ: Ўзбекистонга энг кўп “иномарка”лар қаердан олиб келинди?

2023 йилнинг январь ойида Ўзбекистон 13 та хорижий давлатдан енгил автомобиллар импорт қилган. Бу ҳақда Давлат статистика агентлиги хабар бермоқда.

Январь ойида Ўзбекистон енгил автомобилларни энг кўп Хитойдан импорт қилган — 1 064 та. Ўтган йилнинг айни даврида бу кўрсаткич 1 781 тага тенг бўлган.

Ўзбекистон январь ойида энг кўп автомобиль импорт қилган давлатлар рўйхатида Корея иккинчи ўринда жойлашган. Мамлакатдан 949 та машина олиб келинган. 2022 йилнинг мос даврида Кореядан кўпроқ “иномарка” импорт қилинган эди — 1 136 та.

2022 йилнинг январь ойида Ўзбекистонга енгил автомобиль импорт қилган давлатлар учлигини Россия якунлаган эди — 85 та ”иномарка”. Жорий йилда унинг ўрнини АҚШ эгаллади. Мамлакатдан 110 та енгил автомобиль олиб келинган.

Январда Ўзбекистон автомобиль импорт қилган давлатлар рўйхатида Гонконг тўртинчи ўринда — 29 та. Ўтган йилнинг шу даврида мамлакатдан умуман машина олиб келинмаган эди.

Ўзбекистон автомобиль импорт қилган давлат рўйхатидаги кейинги ўринларда Германия (12 та, Япония (10 та), БАА (8 та) жойлашган.

Аввалроқ Ўзбекистон автомобилларни сотишдан кўра кўпроқ сотиб олаётгани ҳақида хабар берилганди.