Ўзбекистонда пиёз нархи пасайишда давом этмоқда

Ўзбекистонда пиёзнинг улгуржи нархлари динамикасида пасайиш тенденцияси шаклланган. Бу ҳақда EastFruit хабар берди.

Ўтган ҳафтада ушбу маҳсулотлар нархи аввалги ҳафталарга қараганда тезроқ пасайишда давом этди.

Халқаро лойиҳа гуруҳи мева-сабзавот маҳсулотларининг улгуржи нархларини ҳар ҳафта мониторинг қилиб боради. Шунга кўра, Ўзбекистонда пиёзнинг улгуржи нархлари минтақа мамлакатлари орасида энг паст даражага тушиб кетди. 

Нархлар мониторинги натижаларига кўра, 2023 йилнинг 3 мартидан 10 мартигача Ўзбекистонда пиёзнинг ўртача улгуржи нархи 7 000 сўмдан 6 000 сўм/кг гача яъни ўтган ҳафтада 14 фоизга пасайган.

Охирги ой давомида шаклланган пасайиш тенденцияси ҳисобга олинса, 2023 йилнинг 10 февралидан 10 мартигача ушбу маҳсулотларнинг ўртача улгуржи нархи 25 фоизга пасайган.

Ўтган йиллар билан солиштирганда, ҳозирги улгуржи нархлар ҳали ҳам юқори.

2023 йил 10 март ҳолатига кўра, Ўзбекистонда пиёзнинг ўртача улгуржи нархи ўтган йилнинг айни санасидагидан роппа-роса 3 баравар, 2020—2021 йилларнинг шу санасида қайд этилган даражадан эса 5-6 баравар юқори.

Бунга сабаб сифатида икки асосий омилни аниқланди, уларнинг таъсири остида ўтган ой давомида пасайиш тенденцияси шаклланди.

Биринчиси, жорий йилнинг январь—февраль ойларида Ўзбекистонда пиёз импортининг ошиши бўлди. Иккинчиси, февраль ва март ойи бошларида ўртача суткалик ҳароратнинг кескин ошиши. Бу нотўғри шароитларда сақланаётган пиёз захираларининг хавфсизлигига салбий таъсир кўрсатмоқда.

Ўз навбатида, бу ҳолат ушбу маҳсулотлар импортининг рекорд ҳажми билан бир қаторда ишлаб чиқарувчиларни пиёз захираларини тезда сотишга ва бу орқали ички бозордаги таклиф ҳажмини сезиларли даражада оширишга мажбур қилмоқда.

Бундан ташқари, қарийб бир ойдан сўнг ички бозорга кузги пиёзнинг улгуржи партиялари етказиб берилади. Бу эса, ўз навбатида, фермер ва савдогарларни ҳам ўтган йилги пиёз захирасини тезда сотишга мажбур қилмоқда.

Ушбу маҳсулотлар экспортига келсак, ҳозирча Ўзбекистонда пиёз экспорти учун жорий йилнинг апрель ойи охиригача вақтинчалик чекловлар мавжуд.

2023 йил 10 март ҳолатига кўра, минтақа мамлакатларида пиёзнинг ўртача улгуржи нархи (1 кг учун долларда): Ўзбекистон — 0,53 доллар; Тожикистон — 0,73 доллар; Грузия — 0,85 доллар; Молдова — 0,91 доллар; Польша — 0,97 доллар; Украина — 1,23 доллар.

Аввалроқ Қирғизистон пиёз экспортига қўйилган тақиқни муддатидан олдин бекор қилгани ҳақида хабар берилганди.