Америка Урушни ўрганиш институти (ISW) таҳлилчилари 11 март куни нашр этилган кундалик шарҳининг бир қисмини Россиянинг қатор вилоятлари, шунингдек аннексия қилинган Қрим ҳукумати томонидан қурилиши эълон қилинган мудофаа чизиқларига бағишлади.
ISW 9 март куни Белгород вилояти губернатори Вячеслав Гладков Украина билан чегарадош ҳудудларда мудофаа иншоотлари қурилиши якунланганини маълум қилганини эслатди. Гладковнинг айтишича, иншоотлар қурилишига 10 миллиард рубл (131,6 млн доллар) сарфланган. ISW таҳлилчиларига кўра, бу “айниқса, Россиянинг Украинадаги ҳарбий амалиётларини молиялаштира олиш имконияти ҳақидаги саволлар фонида пулни беҳуда сарфлашдир”.
ISW, шунингдек, ҳарбийларни ҳужум эҳтимоли жуда кичик бўлган мудофаа чизиғига юбориш ўрнига ушбу кучларни жанговар зонага ташлаш оқилонароқ бўлишини таъкидлади.
Мудофаа линиялари бошқа ҳудуларда ҳам, жумладан, ISW маълумотларига кўра, “катта эҳтимол билан ҳеч қандай ҳарбий ҳаракатлар бўлмайдиган” Курск вилоятида қурилмоқда. Аннексия қилинган Қримда қурилши айтилган истеҳкомлар эса “фронт чизиғидан анча узоқда”.
ISW таҳлилчиларига кўра, Россия ҳукумати янада долзарброқ жанговар вазифаларни ҳал қилиш учун сарфлаши мумкин бўлган куч ва маблағларни мудофаа чизиқларини қуришга йўналтираётгани уларнинг Украина жанубидаги босиб олинган ҳудудларни ушлаб туриш қобилиятига ишончи комил эмаслигини кўрсатади.
Бундан ташқари, мудофаа иншоотлари қурилиши ахборот кампанияси контекстида ҳам кўриб чиқилаётган бўлиши мумкин — кампания мақсади Россия халқини Украина ўз мамлакатига таҳдид солаётганига ишонтиришдир.
Изоҳ (0)