Тошкент шаҳридаги мактаблардан бирида ўқувчини калтаклаган ўқитувчи жавобгарликка тортилди. Бу ҳақда “Миллий” телеканалининг “Миллар” дастурида маълум қилинди.
Синф хонасига ўрнатилган кузатув камерасидан олинган тасвирларда ўқитувчи 8-синф ўқувчига қўл кўтаргани, бола ўрнидан турган вақтида ўқитувчи уни итариб, хонадан чиқариб юборганини кўриш мумкин.
Қайд этилишича, ҳолат 2 март куни биология дарсида содир бўлган. Ўқитувчи дарс бошламоқчи бўлганида, ўқувчи телефони билан ёнидаги синфдошларини расмга олишни бошлаган. Педагог болани огоҳлантиришига қарамай, ўқувчи унинг айтганини қилмаган. Шундан кейин у бориб, боланинг телефонини олиб қўйган ва дарсини давом эттирмоқчи бўлган. Бола эса ўқитувчини ёмон сўзлар билан ҳақорат қилгани сабаб аёл унга қўл кўтаришга мажбур бўлган.
Жиноят ишлари бўйича Яшнобод туман судининг қарори билан Маъмурий жавобгарлик тўғрисидаги кодекснинг 183-моддасида (Майда безорилик) назарда тутилган ҳуқуқбузарликни содир этган ўқитувчи аёлга БҲМнинг уч баравари миқдорида (900 минг) жарима жазоси тайинланган.
Изоҳ (0)