Андижонда йирик майнинг ферма аниқланди. У давлат ва жамиятга 40,4 млрд сўм зарар етказган

Андижон вилоятининг Андижон туманида ноқонуний майнинг ферма борлиги аниқланди. Бу ҳақда Бош прокуратура ҳузуридаги департамент хабар берди.

Департаментнинг Андижон туман бўлими томонидан олиб борилган тезкор-қидирув тадбирлари ҳамда терговга қадар текширувда «I.П.» МЧЖ мансабдор шахслари ва бошқалар МЧЖга қарашли «Қурама» МФЙ ҳудудида жойлашган чорва фермаси ва ишлаб чиқариш биносида қонунга зид равишда, ўзбошимчалик билан умумий фойдаланишдаги электр тармоғига 845 дона «Битмаин» майнинг крипто-активлари қурилмаларини ўрнатгани аниқланган.

Улар  электр энергиясидан ноқонуний фойдаланиб келиши оқибатида давлат ва жамият манфаатларига 40,4 млрд сўм зарар етказган.

Мазкур ҳолат юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят иши қўзғатилиб, тергов ҳаракатлари ўтказилмоқда.

Мавзуга доир:

• Самарқандда ноқонуний майнинг ферма аниқланди
• Сирдарёда 9,2 млрд сўмлик майнинг-ферма қурилмаларидан ноқонуний фойдаланиб келган шахслар аниқланди
• Хоразмда ноқонуний «крипто майнинг» фаолиятига чек қўйилди