Қирғизистон бош вазири Акилбек Жапаров бошчилигидаги делегация Наманганга келди. Бу ҳақда “Дарё” мухбири Азизбек Абдувалиев хабар бермоқда.
Делегация аъзоларини Наманган вилояти ҳокими Шавкат Абдураззоқов кутиб олди. Меҳмонлар Тўрақўрғон туманида “Ифтихор кийим саноати” МЧЖ томонидан барпо этилаётган ишлаб чиқариш комплекси билан танишди. Вилоят саноатида етакчи мавқега эга бўлиши кутилаётган ушбу мажмуани ташкил этиш учун 17 гектар майдонда қурилиш ишлари олиб борилмоқда. Жапаров қурилиш жараёнлари ва бу ерда тайёрланадиган маҳсулотларни кўздан кечирди.
Делегация аъзолари “Фазман текстиль” корхонаси билан ҳам таништирилди. Яқинда очилган ва мингга яқин янги иш ўринлари яратилган корхонада дунёга машҳур брендлар билан ҳамкорлик қилмоқда. Йилига 1 миллион дона костюм-шим ишлаб чиқариш қувватига эга корхонада ёшларга иш ўргатиш учун ўқув маркази ҳам ташкил этилган.
Қирғиз Республикаси делегациясининг навбатдаги манзили “Аrt Soft Cluster” холдинг компанияси бўлди. Бу ерда 1000 нафар ишчи-ходим меҳнат қилмоқда, компания маҳсулотлари деярли тўлиқ чет элга юборилади.
Акилбек Жапаров Намангандаги текстиль саноатининг салоҳиятига юксак баҳо берди. Қирғизистондаги турдош корхоналар билан яқин алоқалар ўрнатиш, ўзаро тажриба алмашиш бўйича таклифларини билдирди.
Изоҳ (0)