Тошкент вилояти Янгиобод кўп тармоқли наслчилик чорва комплекси 9 март куни умумий қиймати 634 миллион 200 минг сўм бўлган 9 та тендер ўтказди. Уларда жами 2 минг гектарга яқин ерга ҳар турли усулда ишлов бериш хизматлари, шунингдек, маккажўхори поясини комбайнда ўриш ишлари ўйналди.
Эътиборли жиҳати, 9 та тендернинг барчаси учун бор-йўғи иккитагина корхона қизиқиш билдирди:
- “Алишер Мадад МMTP”;
- “Бахт Усмонобод” МЧЖлар.
Тендерларнинг ҳар бир якуний баённомаси, комиссия аъзоларининг хулосалари бир хил: барчасида “Бахт Усмонобод” (100 балл) ғолиб деб топилган. “Алишер Мадад МMTP” эса 82 балл билан захира бажарувчи қилиб кўрсатилган.
Тендер иштирокчиларининг раҳбарияти билан қизиқдик. Натижада бу икки корхона бошқарувчилари ўзаро аффилланган экани аниқланди. Яъни:
“Бахт Усмонобод” МЧЖнинг раҳбари ва ягона таъсисчиси Юсупова Дилдорабону Мухтор қизи ҳисобланади. У бир вақтнинг ўзида бошқа бир МЧЖ — “Когон Ширмой Нон” корхонасининг ҳам раҳбари ҳисобланади.
Бу МЧЖнинг таъсисчилари орасида Саидов Алишер Музаффарович исми бор. Бу тадбиркор эса тендерда Дилдорабону Юсуповага “рақобат таклиф этиб”, ютқазган “Алишер Мадад МMTP”нинг раҳбари ҳисобланади.
Аммо ҳайъат комиссияси бу ҳолатни эътиборсиз қолдириб, бир овоздан тендерни маъқуллаган. Ҳамма рози.
“Давлат харидлари тўғрисида”ги қонуннинг 42-моддасига кўра, иштирокчи рақобатга қарши ҳаракатларни содир этса ёки қонунчиликни бузган ҳолда манфаатлар тўқнашувини келтириб чиқарса, шунингдек, аффилланганлик ҳоллари аниқланса, тендердан четлатилиши ёзилган.
Масъуллардан ушбу шубҳали тендер натижаларига эътибор қаратиб, ноқонуний ҳолатлар бўйича тегишли чора кўришни сўраймиз
Изоҳ (0)