Миграция агентлиги Россияда ишлаётган ўзбекистонликларни огоҳ бўлишга чақирди.
Агентликнинг маълум қилишича, сўнгги вақтларда Россияда ишлаётган меҳнат мигрантлари орасида банк хизматлари билан боғлиқ турли фирибгарликларга дуч келиш ҳолатлари юз бермоқда. Хусусан, қариндошларига пул ўтказиш мақсадида мобил иловадан фойдаланиш жараёнида меҳнат мигранти ҳисоб рақамидан пул ечиб олиш ёки унинг номига юқори фоизли кредитлар расмийлаштириш каби муаммолар учрамоқда.
Ушбу ҳолатлар бўйича ҳуқуқ-тартибот идоралари томонидан қатор суриштирув ишлари бошланган.
“Шу муносабат билан юртдошларимиздан банк хизматларидан, хусусан, пул ўтказиш тизимларидан фойдаланишда эҳтиёткор бўлишни, шахсий маълумотларни ҳеч кимга маълум қилмасликни сўраймиз”, дейилади хабарда.
Аввалроқ Ўзбекистоннинг Россиядаги Бош консуллиги ҳамда Ташқи меҳнат миграцияси агентлиги (ТMMA) кўмагида Ростов вилояти хорижий фуқароларни вақтинча сақлаш марказларидаги 47 нафар Ўзбекистон фуқароси ватанга қайтарилгани ҳақида хабар берилганди.
Изоҳ (0)