“Негрейра иши”. Собиқ ҳакам 2020 йилда “Барселона”га VAR тизимида ёрдам беришни таклиф қилган. Ўша мавсумда “Реал” чемпион бўлганди

Испания ҳакамлар қўмитаси вице-президенти 2020 йилда “Барселона”га VAR тизимида ёрдам беришни таклиф қилган.

Аввалроқ каталонияликлар 2016 йилдан 2018 йилга қадар RFEF техник ҳакамлар қўмитаси собиқ вице-президенти Хосе Мария Энрикес Негрейрага 1,4 миллион евро ўтказгани хабар қилинганди. Клуб бу бўйича баёнот берган ва Футбол федерацияси амалдорига ёш футболчилар ва ҳакамлар ҳақидаги ҳисоботлари учун тўлов амалга оширилганини таъкидлаганди. Шундан сўнг “Барселона” 2003 йилдан бери Негрейрага 4,7 миллион евро тўлагани аниқланди.

Marca нашри “Негрейра иши” борасидаги маълумотларни чоп этишда давом этмоқда. Янги маълумотларга кўра мансабдор каталонияликларга VAR тизимида ёрдам бериш таклифини берган.

Гап клуб Негрейрага тўловлар қилишни тўхтатган давр ҳақида кетмоқда. 

“Сизга VAR’да ёрдам бераман. Агар бу қизиқ бўлса, мен билан боғланинг”, — деган Негрейра “кўк-анорранглилар” раҳбариятига. 

2019/20 йилги мавсумда “Реал” Ла Лигада чемпион бўлган. Худди ўша мавсумда “Барселона” VAR бўйича шикоятлар қолдирган.  

“Барселона” Негрейранинг таклифини эътиборсиз қолдирган.

“Эспаньол” “Негрейра иши” деб аталаётган воқеа юзасидан турли ОАВда чоп этилган маълумотлардан хавотирда эканлиги, “Атлетико” эса Ла Лиганинг барча жамоаларидан норозилик ва қораловчи қўшма баёнот беришини хоҳлаётгани маълум бўлганди.