Ўзбекистон U-20 терма жамоаси бош мураббийи Равшан Ҳайдаров ёшлар ўртасидаги Осиё Кубоги 3-тури доирасида Индонезияга қарши кечган ўйиндаги (0:0) дурангдан кейин ўз фикрлари билан ўртоқлашди.
Ўйин ҳақида
Ўйин муҳим эди. Гуруҳдан чиқишни истадик. Минимум вазифа бажарилганидан хурсандман. Баҳс бизнинг назоратимиз остида ўтди. Менимча, чиройли ва тартибли ўйин бўлди. Индонезия термаси яхши ҳимояланди. Шундай бўлса-да, уларнинг ҳимоясини ёриб ўтишга ҳаракат қилдик. Яхши вазиятлар ҳам яратдик, аммо уларни голга айлантира олмадик.
Мақсад дуранг бўлмагани борасида
Йўқ, мақсад дуранг эмас эди, ротация қилдик. Бу ўйин учун мантиқан олиб қараганда захирада ўтириб қолган футболчиларга ҳам имкон беришимиз мумкин эди. Жароҳатлар, чарчоқдан қўрқдик. Барчани алмаштириб ташлаб, йигитларни тонусдан чиқариб қўймоқчи эмасман. Икки ўйинда кўп куч йўқотган футболчилар бироз дам олиб, куч йиғиши керак эди. Бугун майдонда ҳаракат қилган футболчилар ҳам ёмон ўйин кўрсатгани йўқ.
Австралия ҳақида
Австралияни кузатиб боряпмиз. Улар ўйиндан-ўйинга кучайиб бормоқда. Буни яна таҳлил қиламиз. Мураббийлар штабимиздаги таҳлилчилар ўйинларни кузатиб бормоқда. Ўйинга муносиб тактика ва режани тайёрлаймиз.
Биринчи навбатда навбатда йигитларнинг тикланиш жараёнига аҳамият берамиз. Плей-офф ўйинлари барчасини ҳал қилади, битта хато кечирилмаслиги мумкин. Йигитларни яхши ҳолатга олиб келиб, руҳлантириш, менимча, унчалик муаммо бўлмаса керак. Жаҳон чемпионатига йўлланма, биз, сиз, барча учун керак. Бу баҳсга ҳар тарафлама яхши тайёрланиб, ютиб олишимиз керак.
Футболчилар узоқ масофадан зарба йўлламаётгани борасида
Йигитлар деярли барча ўйинларда узоқдан зарба беришга ҳаракат қилиб кўрди. Индонезия термаси узоқдан зарба бериладиган нуқталарни яхши беркитди. Зарбаларсиз гол бўлмайди. Кимгадир камроқ теп, кимгадир кўпроқ демаймиз. Ҳа, баъзида йигитлар ичкарига кириб боришни истади. Балки шошқалоқлик, балки, совуққонликдир... Ўртасида. Бир томонга кўпроқ ёнбосиш керак.
Ўзбекистон биринчи бўлимда беш ҳимоячи билан ҳаракат қилгани борасида
Беш ҳимоячи кўпроқ 3-4-3 тактикасига ўхшайди. Икки қанот ҳимоячилари ҳужумга кўпроқ чиқиб туради. Ҳимоячиларга шундай вазифа берилганди. Индонезияда бош мураббий имзоси кўриниб турибди. Рақиб тартибли ўйнади. Бизда Аббос ва Умарали қанот ҳужумига ёрдам бериши кутилганди. Мақсадимизга деярли эришдик. Ҳужумда вақт ўтказдик, ҳимояга иш бўлгани ҳам йўқ. Албатта, рақиб зич ўйнагани учун пасларни ўтказиб бера олмадик. Бундай пайтда муаммолар юзага чиқиб келади, — дейди Ҳайдаров.
Ўзбекистон U-20 терма жамоаси А гуруҳида биринчи ўринни қўлга киритди ва чорак финалда Б гуруҳининг иккинчи жамоаси Австралия билан ўйнайди. Мазкур ўйиндаги ғалаба Жаҳон чемпионатига йўлланмасини тақди этади.
Изоҳ (0)