Навоий вилояти Қизилтепа туманида поезд босиб кетган 38 ёшли эркак воқеа жойида ҳалок бўлди. Бу ҳақда Ички ишлар вазирлиги ахборот хизмати хабар берди.
Хабарга кўра, 38 ёшли фуқаро поезд йўлагидан ўтаётган пайтда уни юк поезди босиб кетган. Эркак поезднинг огоҳлантирувчи сигналига аҳамият бермаган. Поезднинг 51 та вагони борлиги сабабли тўхтатишга улгурмаган, анча масофани босиб ўтгач кейин тўхтаган.
Воқеа содир бўлган ҳудудга мутахассислар келганида фуқаро вафот этгани маълум бўлган. Ҳодиса юзасидан ички ишлар ходимларига хабар берилган.
Қизилтепа туманида мазкур ҳолат юзасидан маҳалла вакиллари иштирокида муҳокама ўтказилди. Унда марҳумнинг оиласида ҳеч қандай келишмовчиликлар ва руҳий ҳолати билан боғлиқ вазиятлар юз бермагани қайд этилган. Шунингдек, унинг оиласи нотинч оилалар рўйхатида бўлмагани, эр-хотин жанжаллашгани ҳақида бирор марта хабар бўлмагани таъкидланди.
Маълум қилинишича, ҳозирда ҳолат юзасидан терговга қадар суриштирув ишлари олиб борилмоқда.
Аввалроқ Тошкент туманида 11 февраль куни поезд тагидан ўтаётган эркакнинг оёғи узилиб тушгани ҳақида хабар берилганди.
Изоҳ (0)