Вазирлар Маҳкамасининг “Туризм маҳаллаларида муҳандислик-коммуникация инфратузилмасини ривожлантириш бўйича қўшимча чора-тадбирлар тўғрисида”ги қарори қабул қилинди, деб хабар бермоқда “Дунё” агентлиги.
Ҳужжатда туризм маҳаллаларида ички автомобиль йўллари ва кўприкларни, ичимлик суви ва оқова сув тармоқларини қуриш ва таъмирлаш, электр таъминотини яхшилаш ҳамда алоқа ва ахборотлаштириш соҳасини ривожлантириш бўйича инфратузилма лойиҳаларини молиялаштириш учун 2024—2025 йилларда 205 миллиард сўм маблағ ажратилиши белгилаб қўйилган.
Қарорда Иқтисодиёт ва молия вазирлиги 2024—2025 йилларда давлат бюджети параметрларини шакллантиришда туризм маҳаллаларида амалга ошириладиган инфратузилма лойиҳалари учун 200 миллиард сўм маблағни назарда тутиши белгиланган.
Ушбу ҳужжат билан Қорақалпоғистон Республикаси Вазирлар Кенгаши, вилоят ҳокимликлари буюртмачилар билан биргаликда ушбу қарорга иловалар билан тасдиқланган манзилли рўйхатларга мувофиқ, туризм маҳаллаларидаги инфратузилма лойиҳалари лойиҳа-смета ҳужжатларининг ўз вақтида ишлаб чиқилишини ва белгиланган муддатларда ишга туширилишини таъминлаши қайд этилган.
Шунингдек, инфратузилма лойиҳаларининг манзилли рўйхатдаги объектларнинг лойиҳа-смета ҳужжатлари ишлаб чиқилгандан сўнг уларга ажратилган маблағлар етишмаган тақдирда, ушбу лойиҳалар бўйича уларни қуриш-таъмирлаш ва ободонлаштириш билан боғлиқ қўшимча харажатлар буюртмачиларнинг таклифлари асосида Қорақалпоғистон Республикаси Жўқорғи Кенгеси, халқ депутатлари вилоят Кенгашларининг қарорларига асосан тегишлилиги бўйича Қорақалпоғистон Республикаси бюджети, вилоятлар маҳаллий бюджетларининг қўшимча манбалари ҳисобидан қопланиши белгилаб қўйилган.
Бундан ташқари, Қорақалпоғистон Республикаси Вазирлар Кенгаши ва вилоят ҳокимликлари Қорақалпоғистон Республикаси Жўқорғи Кенгеси ва халқ депутатлари вилоятлар Кенгашларига мазкур қарорда назарда тутилган чора-тадбирларни Қорақалпоғистон Республикаси ва вилоятлар маҳаллий бюджетларининг қўшимча манбалари ҳисобидан молиялаштириш юзасидан таклифлар киритиб бориши ҳам қайд этилган.
Изоҳ (0)