Ички ишлар вазирининг матбуот котиби Шоҳрух Ғиёсов Тошкент шаҳрида бир гуруҳ ёшлар қўлга олиниб, идорага олиб кетилгани айтилган хабарларга муносабат билдирди.
Telegramъдаги “Потребител.уз” каналининг ёзишича, 5 март куни пойтахтда бир гуруҳ вояга етмаган ёшлар ушланиб, иккита автобусда идорага олиб кетилган. “Ёшлар уришмаган, жанжаллашмаган, шунчаки сайр қилиб юрган”, — деб ёзади канал.
Ғиёсовнинг ёзишича, Яшнобод тумани Истиқлол кўчасида жойлашган Халқаро форумлар саройи яқинида 5 март куни “Рёдан” халқаро ёшлар ҳаракатига ўхшаш субмаданиятга қўшилишни тарғиб қилувчи турли шиорларни айтган ҳолда ҳаракатланган 50 га яқин ёшлар тўпланган.
Бундан олдин Тошкент шаҳар Ички ишлар бош бошқармаси “Рёдан” халқаро ёшлар ҳаракатининг мухлислари Ўзбекистонда ҳам борлиги ҳақида огоҳлантирган эди.
Натижада 5 март куни жамоат тартибининг бузилишига йўл қўймаслик мақсадида пойтахт ИИББ томонидан профилактика тадбирлари олиб борилиб, ота-оналар ва ҳодиса иштирокчилари билан суҳбатлар ўтказилган.
“Бузғунчи кучларнинг ёшларимизга таъсирига исбот сифатида ҳаракат иштирокчиларида аниқланган ‘Салом, бугун соат 18:00 да бутун форумни... бузамиз. Пневматик, совуқ ва жанговар қуроллар билан тиш-тирноғимизгача қуролланамиз’ каби чақирувларини келтирамиз. Шунингдек, ижтимоий тармоқларда ҳуқуқни муҳофаза қилиш органларининг ҳаракатларини обрўсизлантиришга уринишлар билан аноним фойдаланувчиларнинг видеолари тарқатилган. Ота-оналарга фарзандлари нима билан машғул бўлаётганига эътибор бериш кераклигини эслатамиз”, — дейилади муносабатда.
Изоҳ (0)