Ўзбекистон билан Саудия Арабистони ҳукуматлари ўртасида ходимларни ишга қабул қилиш бўйича меҳнат соҳасидаги ҳамкорлик тўғрисидаги битим тасдиқланди. Президент бу борадаги тегишли қарорни имзолади.
Камбағалликни қисқартириш ва бандлик вазирлиги ушбу халқаро шартномани амалга ошириш юзасидан масъул ваколатли орган этиб белгиланган.
Ташки ишлар вазирлиги Ўзбекистон томонидан мазкур халқаро шартноманинг кучга кириши учун зарур бўлган давлат ички тартиб-таомиллари бажарилгани ҳамда уни амалга ошириш учун масъул бўлган ваколатли орган белгилангани тўғрисида Саудия Арабистони томонига тегишли билдиришнома юборади.
Вазирлар Маҳкамаси ҳамда тегишли вазирлик ва идора раҳбарлари мазкур халқаро шартнома кучга кирганидан сўнг унинг қоидалари бажарилиши устидан белгиланган тартибда назоратни таъминлайди.
Шавкат Мирзиёевнинг 2022 йил август ойида Саудия Арабистонига амалга оширган давлат ташрифи доирасида умумий қиймати 14,8 миллиард долларга тенг 15 та ҳужжат имзоланган. Шунингдек, Ўзбекистон президенти декабрь ойида Саудия Арабистони подшоҳлиги инвестициялар вазири Ҳолид ал-Фалиҳ бошчилигидаги делегацияни қабул қилганди.
Изоҳ (0)