“Рёдан” қандай ҳаракат ва у нима учун хавф туғдиради?

Тошкент Ички Ишлар бош бошқармаси 3 март куни ота-оналарни “Рёдан” ёшлар ҳаракатидан огоҳлантириб, фарзандларининг ҳаётига, уларда кечаётган ўзгаришларга бефарқ бўлмасликка чақирди. 5 март куни эса Тошкентда “Рёдан” ҳаракатига алоқадорликда гумонланган 50 га яқин ўсмир ушланиб, профилактик суҳбат ўтказилганидан сўнг қўйиб юборилди. “Рёдан” аслида қандай ҳаракат ва у ҳақида нималар маълум?

“Рёдан” ёшлар субмаданияти бўлиб, унинг иштирокчилари манга ва аниме (япон комикслари ва мултфильмлари) “Hunter х Hunter”дан илҳомланган. Ушбу гуруҳдаги ўсмирлар узун қора соч ва катакли шим билан ажралиб туради. Шунингдек, уларнинг кийимларида “4” рақами туширилган ўргимчак расми ҳам тасвирланган. Аниме ва мангада “Геней Рёдан” ёки “Ўргимчаклар” деб номланган жиноий тўда мавжуд ва ўргимчак уларнинг рамзи ҳисобланади.

Дастлаб “Рёдан” ҳаракати интернетдаги бир нечта виртуал жамоалардан ташкил топган. Улар аниме мухлислари бўлиб, жамоада Япония анимеларини муҳокама қилган. Бироқ айни пайтда “Рёдан” ҳаракати турли даражадаги тан жароҳати етказиш, бировнинг мулкига зарар етказишни кўзлаган.

“Рёдан” ҳаракати асосан ўсмирлардан иборат бўлиб, уларнинг энг кичиги 15 ёшда. Россияда “Рёдан” субмаданияти “VKонтанкте” ижтимоий тармоқда ҳам бир нечта жамоаларга эга. Уларнинг энг каттаси 193 мингга яқин обуначига эга.

“Рёдан” ҳаракати иштирокчилари ўз нишонларини аниқлаб, савдо марказларида оммавий муштлашувлар, тартибсизликлар уюштиради. Россияда сўнгги кунларда оммавий муштлашувларда қатнашгани учун 450 га яқин ўсмир, Беларусда эса камида 200 киши ҳибсга олинган. Ушбу субмаданият вакиллари билан Қозоғистонда ва Украинада ҳам профилактика ишлари амалга оширилган.

Тошкент шаҳар Ички ишлар бош бошқармаси ҳам фарзандларга эътиборли бўлишга, уларнинг субмаданий қизиқишларига бефарқ бўлмасликка чақирган.

“Болаларнинг аниме ва мангага бўлган қизиқишини қоралаб бўлмайди. Лекин бу қизиқиши туфайли у номаълум шахсларнинг таъсирига тушиб қолмаётганлигига, виртуал дунёни ҳақиқатдан ажрата олиш қобилиятини йўқотмаганлигига ишонч ҳосил қилинг”, — дейилади огоҳлантиришда.