Покистон оммавий ахборот воситаларини тартибга солувчи органи (PEMRA) собиқ бош вазирни давлат муассасаларига ҳужум қилиш ва нафратни тарғиб қилишда айблаб, телеканалларга Имрон Хоннинг чиқишлари ва матбуот анжуманларини трансляция қилишни тақиқлади. Бу ҳақда Al Jazeera хабар берди.
Тақиқ 4 март куни Имрон Хон Лаҳор шаҳрида нутқ сўзлаганидан сўнг жорий қилинган. Покистон собиқ бош вазири нутқида 2022 йилнинг апрель ойида унинг ҳокимиятдан четлатилиши ортида собиқ армия бошлиғи генерал Қамар Жавед Бажва турганини айтган. Исломобод полицияси Хонни коррупция иши бўйича ҳибсга олишга уринганидан сўнг, сиёсатчи айбловларни рад этган ва ҳибсдан қочган.
ПЕМРА билдиришномасида Хон “ўзининг давлат муассасалари ва зобитларига қарши провокацион баёнотлари орқали асоссиз айбловлар тарқатаётгани ва нафрат қўзғатаётгани, бу қонун ва тартибни сақлашга зарар етказиши” келтирилади.
Тақиқдан қарийб икки соат ўтгач, медиа регулятор Хоннинг Лаҳордаги нутқини трансляция қилгани учун ARY News хусусий ахборот канали лицензияни тўхтатиб қўйган. Хонга хайриҳоҳ ҳисобланган ахборот канали тартибни бузган. Аммо ARЙ расмийси бу айбловни рад этган.
“PEMRA баёноти соат 20:00 дан кейин чиқди ва деярли барча каналлар соат 21:00 да Имрон Хоннинг нутқидан лавҳалар чиқарди. Бироқ тартибга солувчи орган фақат лисензиямизни тўхтатиб қўйди”, — деди исмини ошкор қилмаслик шарти билан гапирган ARЙ расмийси.
Покистоннинг Инсон ҳуқуқлари комиссияси тартибга солувчи органнинг Хоннинг нутқларини электрон оммавий ахборот воситаларида намойиш қилишни тақиқлаш ҳақидаги қарорини қоралади.
“Биз доим хоҳ аввалги ҳукумат, хоҳ янги, овозларни жиловлаш чораларига қарши бўлганмиз ва инсоннинг сиёсий фикридан қатъий назар, сўз эркинлигига содиқ қолишда давом этамиз”, — дейилган баёнотда ва тақиқни зудлик билан бекор қилишга чақирилган.
PEMRA — бу восита
Покистоннинг “Теҳрик-э Инсаф” партиясига мансуб сиёсатчи Ҳаммод Азҳарнинг айтишича, мамлакат демократияни хавф остига қўймоқда.
“Хоннинг нутқларини тақиқлаш нафақат конституцияга, балки сўз эркинлигига ҳам зиддир. Сиёсатчиларнинг сўзлашишини тўлиқ тақиқлаб бўлмайди. Қонунийлик билан боғлиқ муаммоларни бир четга суриб қўйсак, бу жуда антидемократик хусусиятга эга. Ҳозирги режим Имрон Хон ва унинг тобора ортиб бораётган машҳурлигидан хайратланди, энди у бўлажак бош вазир сифатида кўрилмоқда. Биз Хон ва партия ходимларига қарши полиция ҳаракатларининг гувоҳи бўлмоқдамиз. ОАВда репрессия бор. Биз тезда фашистик давлатга айланяпмиз”, — деди у.
Изоҳ (0)