Покистоннинг собиқ бош вазири Имрон Хонга терроризм бўйича айблов қўйилди (видео)

Покистоннинг собиқ бош вазири Имрон Хонга нисбатан терроризмга қарши қонун бўйича жиноят иши очилди.

Покистон ички ишлар вазирининг Twitter’да ёзишича, Имрон Хон «полиция ходимларига таҳдид қилгани ва уларни ҳақорат қилгани учун қонун олдида жавоб бериши керак».

Хон шанба кунги митингда ўз ёрдамчиси ҳибсга олингани ва қийноққа солингани сабабли полиция ходимларини танқид қилган эди.

«Исломобод бош инспектори ва бош инспектор ўринбосари, биз сизни аямаймиз, сизга қарши даъво аризаси киритамиз. Шунингдек, судья Зеба Чаудри, сиз ҳам тайёр бўлинг, чунки биз сизга ҳам қарши чора кўрамиз. Барчангиз уялишингиз керак», — деган Имрон Хон.

Покистон расмийлари ўтган ҳафта Имрон Хон ёрдамчисини армиядаги қўзғолонни ташкил қилишда айблаб, қўлга олишганди.

Имрон Хон апрель ойида парламентдаги овоз бериш орқали ҳокимиятдан четлатилганидан сўнг янги сайловлар ўтказишни талаб қилиб келмоқда.

Шуни ҳам таъкидлаш керакки, Хоннинг шанба кунги мурожаатини жонли трансляция қилиш регулятор томонидан тақиқлаб қўйилди.

Кейин, якшанба куни кечқурун Хон ҳукуматни сиёсий митингдаги нутқини тақиқлаш учун янаям кескинроқ чоралар кўриб, YouTube’ни вақтинча блоклашгача боришда айблади.

Покистон Телекоммуникация бошқармаси YouTube блокланиши бўйича ҳолатни изоҳламаган.