Покистон суди 28 февраль куни мамлакат собиқ бош вазири Имрон Хонни ҳибсга олишга ордер берди. Бу ҳақда Associated Press хабар берди.
Маълум қилинишича, сиёсатчи ўз тарафдорларини кескин сиёсий инқироз шароитида норозилик намойишларини давом эттиришга чақирган. Исломобод суди собиқ бош вазирни ҳибсга олишга ордер бериб, Имрон Хон ҳукумат совғаларини сотишда ва мулкини яширганликда айбланган суд мажлисини ўтказиб юборганини таъкидлади.
Судьянинг буйруғи Покистондаги “сиёсий драма” кунида эълон қилинди, чунки яна учта суд 28 февраль куни Хонни ҳибсга олмаслик ҳақида қарор чиқарди. Хон бир неча ойдан бери бош вазир Шаҳбоз Шарифнинг амалдаги ҳукуматини ағдариш учун муддатидан олдин сайловлар ўтказишга чақирган норозилик намойишларига бошчилик қилмоқда.
Имрон Хон апрель ойида қонун чиқарувчиларнинг ишончсизлик вотуми натижасида бош вазир лавозимидан четлатилганди. У Шарифни далил келтирмасдан уни ҳокимиятдан четлатиш учун АҚШ билан тил бириктирганликда айблаган. У учун ҳуқуқий муаммолар кучайишда давом этмоқда. Октябр ойида сайлов трибунали Хонни бош вазир сифатида давлат совғаларини сотиш ва мол-мулкни яширишда айблаб, давлат лавозимини эгаллаш ҳуқуқидан маҳрум қилган.
Хон ва Шариф ҳукумати ўртасидаги қарама-қаршилик мамлакатни ларзага келтирди, чунки Покистон иқтисодиёти оғир муаммоларга ва кучайиб бораётган валюта инқирозига дуч келди. Покистон Халқаро Валюта Жамғармаси билан 2019 йилда Хон ҳокимиятда бўлганида имзоланган молиявий ёрдам дастурини янгилаш бўйича музокаралар олиб бормоқда. Moody’s Investors Service 28 февраль куни Покистон рейтингини пасайтирди. Бу ҳаракат Покистоннинг ташқи қарзларини тўламай қолиши мумкинлигидан огоҳлантириш сифатида кўрилмоқда.
Аввалроқ Покистон Сайлов комиссияси собиқ бош вазир ва “Теҳрик-э Инсаф” партияси раиси Имрон Хонни сайлов органига ҳурматсизлик қилгани учун ҳибсга олишга ордер берганди.
Изоҳ (0)