Покистон собиқ бош вазири Имрон Хон ҳукумат истеъфосини талаб қилмоқда. Унинг тарафдорлари намойишга чиқди (фото)

Покистоннинг собиқ бош вазири ва «Теҳрик-и-Инсаф» партияси раҳбари Имрон Хон ҳукуматга ультиматум қўйди. Хон олти кун ичида парламентни тарқатиб юборишни ва муддатидан олдин сайловлар ўтказишни талаб қилмоқда.

25 май куни Покистон пойтахти Исломободда Имрон Хон тарафдорлари норозилик намойиши ўтказди. Ҳукумат намойишчиларнинг бир қисми кирмаслиги учун Исломободга олиб борувчи йўлларни тўсиб қўйган ҳамда шаҳарнинг асосий ҳукумат бинолари жойлашган «қизил зонаси»га қўшинларни киритган. Дастлаб намойишчилар норозилик белгиси сифатида ўтиришни режалаштирган, аммо намойишлар полиция билан тўқнашувга айланиб кетган. Полиция намойишчиларни тарқатиш учун кўзни ёшлатувчи газ ишлатган.

«Мен ҳукуматга мурожаат қилмоқчиман: олти кун ичида сайловларни эълон қилинг. Парламентни тарқатиб юборинг ва июнь ойида сайловларни ўтказинг», — дея Имрон Хоннинг сўзларини келтиради AFP. Хон шартлари бажарилмаса, намойишлар давом этишини айтган.

Имрон Хон 9 апрель куни мамлакат парламенти унга нисбатан ишончсизлик вотумини қабул қилганидан сўнг лавозимидан четлатилган эди. Хон уни ҳукуматдан олиб ташлаш ортида АҚШ расмийлари турганини айтган. Унинг ўрнига Шаҳбоз Шариф сайланди. Хон Шарифни «Американинг қули» деб атади.

Имрон Хон 24 февраль куни ҳукумат ташрифи билан Москвага борганидан кейин Покистонда сиёсий инқироз кучайган эди.