Россия Мудофаа вазирлигининг расмий саҳифасида вазирлик раҳбари Сергей Шойгунинг Мариуполга сафари пайтида олингани айтилган видео эълон қилинди. Вазирлик қайд этишича, ташриф “махсус ҳарбий операция зонасига иш сафари” доирасида амалга оширилган.
Видеода Шойгу вертолёт бортида, аҳоли пункти кўчасида ва тиббиёт пункти биносида кўринган. Унга Фавқулодда вазиятлар вазирлиги кийимидаги ва камуфляж кийган, қуролланган одамлар ҳамроҳлик қилган. ОАВ видео қачон ва айнан қаерда тасвирга олинганини ҳали аниқлай олмади.
Вазирлик маълумотларига кўра, Мариуполда Шойгу “Донбасс инфратузилмасини тиклаш” бўйича Россия Мудофаа вазирлигининг ҳарбий қурилиш комплексини ишини текширган. Бошқа нарсалар қаторида, вазир кўп функцияли тиббиёт маркази, ўзини ўзи республика деб эълон қилган Донецк халқ республикаси Фавқулодда вазиятлар вазирлигининг қутқарув маркази ва янги микрораёнда бўлди, дейилади пресс-релизда,
“Шунингдек, Сергей Шойгу Ростов вилояти ва ДХРни боғловчи энг йирик сув қувури қурилиши ҳақидаги ҳисоботни тинглади. Дон дарёсидан Северский Донец-Донбасс каналигача бўлган сув ўтказгич минтақадаги кўплаб аҳоли пунктларини сув билан таъминлайди”, — қўшимча қилинган вазирлик хабарида.
4 март куни Россия Мудофаа вазирлиги Шойгу “махсус операция” зонасига, жумладан, “Восток” қўшинлари гуруҳининг Жанубий Донецк йўналишидаги тузилмаларидан бирининг фронтга яқин назорат постига ташриф буюрганини маълум қилди. Бундан олдин вазирлик январь ойида Шойгунинг уруш зонасида текширув ўтказгани ҳақида хабар берган эди.
2022 йил декабрь ойида вазирлик ўз раҳбарининг уруш ҳудудига қилинган яна икки сафари ҳақида гапирди. Хусусан, 18 декабрь куни Россия Мудофаа вазирлиги матбуот-релизига кўра, Шойгу россиялик ҳарбийларнинг “олдинги позицияларини” текширган. Фаоллар эълон қилинган видеони таҳлил қилиб, Шойгу фронтдан 80 километр узоқда деган хулосага келишди.
Россия қўшинлари Украинага босқиннинг бошиданоқ Мариуполни эгаллашга ҳаракат қилди. “Азовстал” заводида мудофаани ушлаб турган Мариуполнинг сўнгги украиналик ҳимоячилари таслим бўлгандан сўнг, май ойи ўрталарида россияликлар шаҳарни назорат қилишга муваффақ бўлди. Сентябрь ойи охирида Россия шаҳарни ДХР таркибига қўшиб олди.
Изоҳ (0)