Февраль ойида истеъмол секторидаги товарлар ва хизматлар ўртача 0,5 фоизга ошган. Бу ҳақда Давлат статистика қўмитаси хабар бермоқда.
Кўрсаткичларга кўра, истеъмол секторидаги нархларнинг йиллик ўсиш даражаси 12,2 фоизга етди. Йил бошидан бери нархлар 1,4 фоизга ошди.
2023 йилнинг февраль ойида нархлар ва тарифлар ўсишида етакчи ўринларни озиқ-овқат маҳсулотлари эгаллаб, ой давомида уларнинг нархлари ўртача 0,7 фоизга ошган.
Шу даврда ноозиқ-овқат товарлари нархлари 0,3 фоизга ва аҳолига пуллик хизматлар кўрсатиш 0,5 фоизга ошгани кузатилган.
2023 йилнинг февралида пиёз нархи ўтган ойга нисбатан 9,8 фоизга ошди. Помидор ва Бодринг эса мос равишда 9,3 ва 9,2 фоизга қимматлашди.
Пиёз нархлари ўтган йилнинг февралига нисбатан 197,2 фоизга ошган. Шунингдек, сабзи (26,8 фоизга ошган), бодринг (21,4 фоиз), лавлаги (12,3 фоиз), банан (8,1 фоиз) ва помидор (7,1 фоиз) нархлари ҳам 2022 йилнинг февралига нисбатан кўтарилган.
Мазкур даврда нархи арзонлашган маҳсулотлар орасида картошка (5 фоизга пасайган), карам (22,6 фоиз), олма (23,7 фоиз), лимон (24,5 фоиз) ва саримсоқ (28,8 фоиз) бор.
Расмий статистикага кўра, йил бошидан бери инфляция (1,4 фоиз) сўнгги тўрт йилликдаги энг паст кўрсаткичда бўлди.
Изоҳ (0)