Ўзбекистонда келгусида жиноятларни тергов қилиш жараёнида прокурорларнинг айрим ваколатлари судларга ўтказилади. Бу ҳақда президентнинг тегишли фармони билан тасдиқланган дастурда сўз боради.
Унга кўра, мамлакатда келгусида жиноятларни тергов қилиш жараёнида “Хабеас корпус” институтини қўллаш амалиётини янада кенгайтириш мақсадида тинтув ўтказиш, телефон сўзлашувларини эшитиб туриш ва мулкни хатлашга санкция бериш ваколати прокурорлардан судларга ўтказилади.
Адолат ва қонун устуворлигини мустаҳкамлаш, инсон ҳуқуқ ва эркинликларига сўзсиз риоя этилишини таъминлаш борасида юқоридаги тартибни назарда тутувчи қонун лойиҳаси Олий Мажлис Қонунчилик палатасига киритилади.
Шунингдек, фармоннинг мазкур банди билан жиноят ишини судларга айблов хулосаси (айблов далолатномаси) ва ҳимоячи фикри билан бирга тақдим этиш тартибини жорий этиш ҳамда адвокатлик фаолияти билан шуғулланиш ҳуқуқини берувчи лицензияни олиш учун юридик мутахассислик бўйича камида икки йиллик иш стажига эга бўлиш талабини бекор қилишга оид ҳужжат лойиҳаларини ҳам ишлаб чиқиш вазифаси қўйилган.
Ушбу масалалар бўйича тегишли қонунлар лойиҳаларининг давлат дастурида белгиланган муддатларда ишлаб чиқилиб, киритилишини таъминлаш эса Олий суд, Адлия вазирлиги ва Бош прокуратурага юкланган.
Изоҳ (0)