АҚШ Давлат котиби ўринбосари Виктория Нуланднинг айтишича, АҚШ аннексия қилинган Қримдаги Россия ҳарбий объектларига Украина томонидан зарба берилишини қўллаб-қувватлайди. Бу ҳақда у 16 февраль куни Карнеги марказида онлайн сўзлаган нутқида маълум қилди.
“Россия Қримда кўплаб ҳарбий иншоотлар қурган, булар Украина зарба бермоқчи бўлаётган қонуний нишонлар ва биз буни қўллаб-қувватлаймиз. Қрим ҳеч бўлмаганда қуролсизлантирилмас экан, Украина хавфдан ҳоли бўлмайди”, — деди Нуланд.
Унинг қўшимча қилишича, уруш тугаганидан кейин ҳам Қўшма Штатлар Украинага ҳарбий ёрдам кўрсатишда давом этади, чунки Россия можарони қайта бошламаслигига кафолат йўқ.
Шу куни Давлат департаментида бўлиб ўтган брифингда ҳам Виктория Нуланд АҚШ Украинанинг Россия томонидан босиб олинган барча ҳудудларини қайтариш истагини қўллаб-қувватлашини айтди. “Украина халқаро чегаралар доирасидаги барча ерларини қайтариш учун курашмоқда. Биз уларни қўллаб-қувватлаймиз”, — деди Нуланд.
Брифинг чоғида Давлат департаменти раҳбари ўринбосари Россия урушнинг бир йили давомида 200 мингдан ортиқ одамидан айрилгани, улар жангларда ҳалок бўлган ёки яраланганини айтди. Февраль ойи бошида The New York Times ҳам АҚШ ва бошқа Ғарб расмийлари Россиянинг йўқотишларини 200 мингга баҳолаётгани ҳақида хабар берганди.
Украина расмийлари Россия билан уруш рус қўшинлари босиб олинган барча ҳудудлардан, жумладан, 2014 йилда аннексия қилинган Қримдан чиқиб кетганидан кейингина тугаши мумкинлигини бир неча бор таъкидлаган. Киев вакиллари Қримни қайтариш бўйича ҳарбий операция ўтказиши эҳтимоли ҳақида ҳам бир неча бор айтган.
Изоҳ (0)