Минскдан 12 километр узоқликда жойлашган Macҳулиши посёлкасидаги Беларусь ҳарбий аэродромида бир нечта портлашлар содир бўлди, деб хабар берди BYPOL — Беларусь ҳуқуқ-тартибот органларининг собиқ ходимлари томонидан тузилган мухолифат лойиҳаси. Дастлаб фаоллар портлаш оқибатида Россия ҳарбий-транспорт самолёти ва қор тозалаш машиналарига зарар етганини ёзишган, шу билан бирга, портлаш сабабларига аниқлик киритилмаган.
Кейинчалик BYPOL ҳарбий аэродромда саботаж содир этилгани, оқибатда Россия ҳарбий ҳаво десантларининг А-50 эрта огоҳлантириш ва назорат радарига эга самолёти жиддий зарар кўргани ҳақида хабар берди: “Самолётнинг олд ва марказий қисмларига зарар етган, авионика ва радар антеннаси шикастланган”, — дейилади лойиҳа баёнотида.
Ўз навбатида, BYPOL раҳбари Александр Азаров “Наша Нива” нашрига Macҳулиши аэродромидаги қўпорувчилик ҳаракатларида Беларусь партизанлари иштирок этганини айтди. Азаров “Бельсат” нашрига берган изоҳида ҳужум дронлар ёрдамида амалга оширилгани ва операциянинг барча иштирокчилари аллақачон Беларусдан ташқарида эканини маълум қилди.
Аэродромдаги портлашлар ҳақидаги маълумотни журналист Антон Мотолко ва “Беларусь за МКАДом” Telegram канали тасдиқлади. “Беларуски Гаюн” Telegram канали Россиянинг А-50 самолёти “тепадан номаълум нарсанинг қулаши оқибатида бироз зарар кўрган бўлиши мумкинлиги” ҳақида хабар берди. Россиялик ҳарбий мухбирлар Юрий Котенок ва Семён Пеговлар ҳам аэродромга учувчисиз учоқлар ҳужум қилган бўлиши мумкинлигини ёзган.
Беларусь ва Россия Федерацияси расмийлари воқеа юзасидан ҳозирча изоҳ бермаган. “Зеркало” журналистлари Беларусь Фавқулодда вазиятлар вазирлиги ва Мудофаа вазирлиги билан боғланишди. Фавқулодда вазиятлар вазирлиги нашрга портлашлар ҳақида ҳеч қандай маълумот олмаганини маълум қилган бўлса, Мудофаа вазирлиги “ҳеч қандай жиддий нарса юз бермаганини” таъкидлади.
Изоҳ (0)