Покистон энг ёмон иқтисодий инқироз билан курашмоқда, мамлакатда валюта захиралари сўнгги 10 йилдаги энг паст даражага етди. Ҳукумат ҳолат юзасидан вазирларга маош беришни вақтинчалик тўхтатди. Ўзбекистон, Хитой ва Эрон Покистонга молиявий инқироздан чиқишига ёрдам бермоқда. Бу ҳақда CNBC хабар берди.
Мамлакат иқтисодий ёрдам олиш мақсадида Халқаро валюта жамғармаси (XВЖ) томонидан белгиланган шартларни бажариш учун ўз сиёсатини ўзгартирди. XВЖ солиқ тушумларини кўпайтиришни ва уларга муҳтож бўлмаган одамлардан субсидияларни олиб қўйиш орқали қимматбаҳо ресурсларни янада адолатли тақсимлашни таклиф қилган. Шундан сўнг Покистон Миллий ассамблеяси ҳукуматнинг 2023 йилги молия қонун лойиҳасини ёки “мини-бюджет”ни бир овоздан маъқуллади ва ҳашаматли товарлар ва хизматларга солиқларни оширди.
Шунингдек, мамлакат ёқилғи ва асосий товарлар нархини ҳам ошириб юборди, бу эса оддий одамларнинг асосий эҳтиёжларини қондиришини қийинлаштирди. Бир неча ҳафта олдин 2,9 миллиард долларга тушиб кетган Покистоннинг валюта захиралари ҳозирда 4 миллиард долларга яқинлашиб қолган. Ушбу беқарор иқтисодий вазият шароитида Эрон Покистон билан савдо-сотиқни ривожлантирмоқда, Хитой эса мамлакатга 700 миллион доллар янги кредит берди. Ўзбекистон мамлакат билан 1 миллиард долларлик савдо-сотиқ шартномасини имзолади.
Хитой хорижий заҳираларни тўлдириш учун 700 млн доллар миқдорида кредит беради
Шу ҳафта Покистон ўзининг валюта захираларини оширишга ёрдам бериш учун Хитойдан 700 миллион доллар кредит олди. Бу ҳақда молия вазири Исҳоқ Дар Twitterъда маълум қилди ва буни Покистон учун “ҳаёт чизиғи” деб атади.
“Бугун Покистон давлат банки Хитой тараққиёт банкидан 700 миллион доллар олди”, — деган вазир.
Хитой тараққиёт банки орқали тақдим этиладиган кредит линияси Покистоннинг валюта захираларини тахминан 20 фоизга оширади. Хитой аллақачон Покистоннинг энг йирик кредитори бўлиб, унинг тижорат банкларига ташқи қарзининг қарийб 30 фоизи тўғри келади.
Эрон молиявий инқироз шароитида Покистон билан савдо-сотиқни ривожлантирмоқда
Эрон инқирозга учраган Покистон билан савдони кучайтириш учун олтита чегара бозорини яратди. Ўтган 10 ойда ўзаро товар айирбошлаш ҳажми 2 миллиард долларга етди, мақсад 5 миллиард долларни ташкил қилмоқда. Виза сиёсати юмшатилган ва Покистон билан товар айирбошлашда муваффақиятга эришилган. Покистон ва Эрон ўртасида дўстона алоқалар мавжуд, бироқ икки томон ўртасидаги савдо ҳали керакли даражада ривожланмаган.
Ўзбекистон Покистон билан 1 млрд долларлик савдо-сотиқ шартномасини имзолади
24 февраль куни Тошкентда бўлиб ўтган Савдо-иқтисодий ва илмий-техникавий ҳамкорлик бўйича Покистон—Ўзбекистон ҳукуматлараро комиссиясининг 8-йиғилишида Ўзбекистон Покистон билан ўзаро савдо ҳажмини ошириш бўйича 1 миллиард долларлик келишув имзолади.
Покистон ҳукуматининг Иқтисодий ишлар департаменти расмий баёнотида айтилишича, икки давлат товар ва хизматлар алмашинувини рағбатлантириш бўйича келишув имзолади. Ҳар қандай инвестиция имконияти энг оғир молиявий инқироз билан курашаётган Покистон иқтисодиёти учун муҳим ҳисобланади.
Покистонда харажатларни қисқартириш бўйича чора-тадбирлар
22 февраль куни Покистон бош вазири Шаҳбоз Шариф йилига 766 миллион доллар тежаш мақсадида вазирлар ва маслаҳатчиларнинг нафақалари ва саёҳат харажатларини қисқартиришини эълон қилди.
Эълон қилинган чора-тадбирларга асосан Вазирлар Маҳкамаси аъзолари ва ҳукумат амалдорларидан телефон, электр энергияси, сув ва газ каби коммунал тўловларни ўзи тўлаши ва барча ҳашаматли транспорт воситаларини аукционга қайтариши керак. Шунингдек, чет элга чиқиш вақтида беш юлдузли меҳмонхоналарда қолиш тақиқланди.
2024 йилнинг июнигача ҳашаматли товарлар, жумладан, автомашиналар сотиб олишни қатъий тақиқлаш, хорижий ваколатхоналар ва идоралар сонини қисқартириш, газ ва электр энергиясини тежаш мақсадида давлат идораларини ёзда эрталаб соат 07:30 да очиш белгиланган. Ҳукумат тадбирларида бир таом сиёсати, енгил тушликда фақат чой ва печене берилиши керак, ҳукумат амалдорларига хавфсизлик машиналари берилмайди.
Изоҳ (0)