Дунёнинг 43 мамлакатида бир миллиарддан ортиқ одам вабо билан касалланиш хавфи остида. Ушбу ҳафтада яна уч мамлакатда янги вабо эпидемияси қайд этилган. Бу ҳақда Женевада бўлиб ўтган брифингда Жаҳон соғлиқни сақлаш ташкилотининг (ЖССТ) вабо ва диарея эпидемик касалликлари бўйича гуруҳ раҳбари Филипп Барбоза маълум қилди.
“Бизнинг ҳисоб-китобларга кўра, 43 мамлакатда миллиарддан ортиқ одам вабо билан касалланиш хавфи остида. Ўтган ҳафтанинг ўзида уч мамлакатда янги эпидемиялар қайд этилган. Ҳозирда ЖССТнинг бешта минтақасида жойлашган жами 22 давлат вабо эпидемиясига қарши курашмоқда”, — деди Филипп Барбоза брифингда.
Барбоза 2021 йил билан солиштирганда 2022 йилда икки баравар кўп мамлакатлар вабо эпидемиясига дуч келганини эслатди. У шунингдек, “ўлим кўрсаткичлари охирги ўн йил ичида энг юқори” эканига эътибор қаратди.
“2021 йилда дунё бўйлаб вабодан ўлим ҳолатлари деярли 2 фоизни ташкил этди, бу мақбул чегарадан анча юқори. Дастлабки маълумотларга кўра, 2022 ва 2023 йиллар учун ҳам худди шундай”, — деди ЖССТ гуруҳи раҳбари.
Унинг сўзларига кўра, вабо эпидемиялари сонининг ўсиш тенденцияси давом этмоқда. Касалланишлар сонининг кўпайишига қашшоқлик, можаролар ва табиий офатлар сабаб бўлмоқда.
2022 йил декабрь ойида ЖССТ вабога қарши вакциналар етишмаслиги ҳақида ҳам хабар берганди. Филипп Барбоза вабога қарши вакциналарнинг жаҳон захиралари “бўшаб қолгани ёки жуда кам” эканини айтган.
Изоҳ (0)