Украинадаги урушни тугатиш бўйича Хитой таклиф қилган “тинчлик режаси” Россиядан бошқа ҳеч кимга фойдали эмас. Бу ҳақда АҚШ президенти Жо Байден ABC News телеканалига берган интервьюсида айтиб ўтди.
“Мен Хитойнинг ушбу режасида у амалга оширилган тақдирда, Россиядан бошқа бировга фойда келтириши мумкин бўлган бирор нарсани кўрмадим”, — деди Байден.
Бундан ташқари, Байден урушни тугатишда Хитой таклиф қилган тинчлик музокаралари ғоясини қатъиян рад этиб, уни мантиқсиз деб атади.
“Хитой урушнинг Украина учун мутлақо адолатсиз бўлган якуни бўйича музокара олиб боради, деган ғояда мантиқ йўқ”, — деди Байден.
Америка етакчиси 2022 йилнинг ёзида Хитой раҳбари Си Цзиньпин билан бўлиб ўтган суҳбатини ҳам эслади, ўшанда у Хитой раисини Россияга ёрдамнинг иқтисодий оқибатлари ҳақида огоҳлантирганди.
Эслатиб ўтамиз, 24 февраль куни Хитой Украина ҳудудидаги урушни ҳал қилиш бўйича 12 бандлик “тинчлик режаси”ни тақдим этди. Ҳужжатда асосий бандлар сифатида Украина ва Россия ўртасида ўт очишни тўхтатиш ва тинчлик музокаралари кўзда тутилган.
Режа эълон қилинишидан олдинроқ Хитой ташқи дипломатияси етакчиси Ван И Москвага келган ва у ерда Россия президенти Владимир Путин билан учрашган. AFP хабарига кўра, Хитой режани тақдим этишдан олдин Украина билан маслаҳатлашмаган.
Пекиннинг ташаббусига жавобан Қўшма Штатлар Хитой режанинг биринчи бандидаёқ, яъни барча давлатлар суверенитетини ҳурмат қилишда тўхтаса ҳам бўлаверишини таъкидлади.
Изоҳ (0)