Ўзбекистонда дам олиш кунлари ҳаво ҳарорати 5 даражагача совийди

“Ўзгидромет” 25-26 февраль кунлари республика бўйлаб кузатиладиган об-ҳаво прогнозини эълон қилди.

Қайд этилишича, 25 февраль куни Ўзбекистон бўйича ёғингарчилик (ёмғир, қор) бўлади, тоғолди ва тоғли ҳудудларнинг баъзи жойларида қор ёғади.

Бухоро, Навоий, Хоразм вилоятларида кечаси ва эрталаб бироз қор ёғади Фақат Қорақалпоғистон Республикаси бўйича қуруқ об-ҳаво кузатилади. Ҳаво ҳарорати пасаяди ва кўплаб ҳудудларда кечаси ва кундузи 0-5 даража илиқ, шимолда кечаси 5-10 даража совуқ, кундузи 0-5 даража илиқ атрофида бўлади.

Республика бўйича баъзи жойларда шамол 15-20 метр/секундгача кучайиши кутилмоқда.

26 февраль куни Ўзбекистоннинг барча ҳудудлари бўйича қуруқ ва кам булутли об-ҳаво бўлади. Республиканинг катта қисмида ҳарорат кечаси 2-5 даражагача совуқ бўлади. Кундузи қуёш чиқиши ҳисобига ҳаво ҳарорати 7-12 даражагача илиқ бўлади.

Республика бўйича баъзи жойларга туман тушиши мумкин. Шу кунларда республиканинг тоғли ҳудудларида қор кўчиши хавфи бор.

Тошкент шаҳрида эса 25 февраль куни вақти-вақти билан ёғингарчилик (ёмғир, қор) бўлади, туман тушиши мумкин. Шамол ғарбдан 5-10 метр/секунд тезликда эсади, 12-15 метр/секундгача кучайиши мумкин. Ҳаво ҳарорати кечаси ва эрталаб 3-5 даража илиқни ташкил этади, кундузи 0-2 даражагача илиқ бўлади.

Якшанба кунига келиб, ёғингарчиликсиз об-ҳаво кузатилади. Кечаси ва эрталаб туман тушиши мумкин. Шамол шарқдан 3-8 метр/секунд тезликда эсади. Ҳаво ҳарорати кечаси 2-4 даража совуқ, кундузи 8-10 даража илиқ бўлади.