Сирдарёда ЙПХ масканида келиб чиқиши номаълум бўлган 2,6 тонна ҳайвон гўшти тўхтатиб қолинди. Бу ҳақда Ветеринария ва чорвачиликни ривожлантириш қўмитаси ахборот хизмати хабар берди.
Хабарга кўра, ҳолат вилоят Ветеринария ва чорвачиликни ривожлантириш бошқармаси ҳамда вилоят Ички ишлар бошқармаси ЖХХ ЖЦБ карантин гуруҳи мутахассислари “Сирдарё” ЙПХ масканида ўтказган тадбирда аниқланган. Ҳеч қандай ҳужжатларсиз, келиб чиқиши номаълум бўлган 2590 килограмм ҳайвон гўштини Тошкентга олиб келаётган тадбиркор фаолиятига чек қўйилди.
Самарқанд—Тошкент йўналишида ҳаракатланиб келаётган Isuzu холислар иштирокида тўхтатилиб текширилганда, Каттақўрғон туманида яшовчи, 1999 йилда туғилган А.Р. бошқарувидаги автотранспорт юкхонасида ҳеч қандай ҳужжатларсиз, келиб чиқиши номаълум бўлган 2590 килограмм ҳайвон гўшти борлиги аниқланди.
Вилоят Ҳайвонлар касалликлари ташхиси ва озиқ-овқат маҳсулотлари хавфсизлиги давлат маркази мутахассислари томонидан лаборатория текширувлари учун намуналар олинди. Олинган гўшт маҳсулотлари вақтинча сақлаш учун Гулистон шаҳар, Қурувчилар кўчаси 1-уйда жойлашган Бунёдкор Гўшт–Сут Инвест Trade МЧЖ музхонасига жойлаштирилди.
Автотранспорт воситалари тегишли тартибда қонуний чора кўриш учун вилоят Ички ишлар бошқармаси ЖХХ йўл ҳаракати хавфсизлиги бошқармаси жарима майдонига жойлаштирилди. Ҳозирда ҳолат юзасидан суриштирув ўтказилмоқда.
Изоҳ (0)