Украина бокс федерацияси эркаклар ва аёллар ўртасида ўртасидаги 2023 йилги Жаҳон чемпионатларида иштирок этмаслигини маълум қилди. Бунга сабаб сифатида федерация Халқаро бокс ассоциациясининг (IBА) Россия ва Беларусь боксчиларининг мусобақаларга қўйилганини кўрсатган.
Жавобимиз аниқ: бизнинг спортчилар ва Украина бокс федерацияси вакиллари Россия ва Беларусь вакиллари қатнашадиган жойга бормайди, — деган ташкилот вице-президенти Олег Илченко.
Шунингдек, Илченко агар россиялик ва беларуслик боксчилар Париж—2024 Олимпия ўйинларига қўйиладиган бўлса, Украина бу мусобақани ҳам бойкот қилишини таъкидлаб ўтган.
Россиялик Умар Клемлёв бошчилик қиладиган IBА директорлар кенгаши Россия ва Беларусь спортчиларининг халқаро мусобақалардаги иштирокини чеклаш ҳақидаги қарорни бекор қилганди. Бу қарор 5 октябрдан кучга кирган.
Аввалроқ АҚШ, Швеция, Ирландия, Чехия ва Канада эркаклар ҳамда аёллар ўртасидаги чемпионатни бойкот қилганди. Буюк Британия эса аёллар ўртасидаги Жаҳон чемпионатига бормаслигини, эркаклар ўртасидаги мусобақа борасида кейинроқ қарор қабул қилиниши маълум қилганди. IBА федерацияларнинг бу ҳаракатига муносабат билдирганди.
Бокс бўйича аёллар ўртасидаги Жаҳон чемпионати 15—31 март кунлари Ҳиндистоннинг Нью-Деҳли шаҳрида, эркаклар ўртасидаги Жаҳон чемпионати Ўзбекистонда 1—14 май кунлари Тошкентда бўлиб ўтади.
Изоҳ (0)