Футбол бўйича Европа Лигасининг 1/8 финалига ўтиш ўйинида “Манчестер Юнайтед” ва “Барселона” жамоалари 23 февраль, пайшанба куни ўзаро тўқнаш келди.
Учрашувда манкунианликлар 2:1 ҳисобида (умумий ҳисоб 4:3) ғалаба қозонди ва мусобақанинг нимчорак финалига йўл олди.
“Манчестер Юнаед” 2008 йилдан буён илк бор каталонияликлар устидан ғалаба қозонди. Ўша вақтда “қизил иблислар” Чемпионлар Лигаси ярим финалида испан жамоаси устидан 1:0 ҳисобида зафар қучган. Шундан бери жамоалар ўзаро 5 марта тўқнаш келган ва 4 тасида “Барселона”нинг қўли баланд келган. Битта ўйинда дуранг натижа қайд этилган.
Манкунианликлар жорий мавсум мағлубиятсиз сериясини 9 та ўйинга узайтирди. Эрик тен Ҳаг жамоаси сўнгги бор 22 январь куни АПЛ доирасида “Арсенал”га 2:3 ҳисобида мағлуб бўлганди. Шундан сўнг жамоа 7 та ғалаба ва 2 та дуранг натижа қайд этди.
“Барселона” эса 2022 йил октябрдан буён илк бор мағлубиятга учради. Хави шогирдлари сўнгги бор 26 октябрда “Бавария”га имкониятни бой берганди. Шундан кейин “кўк-анорранглилар” 16 та ғалаба ва 2 та дуранг қайд этганди.
Хави қўл остида жамоа сўнгги 14 ойда 4 марта Еврокубоклардан чиқиб кетди. 2021/22 йилги мавсумда Чемпионлар Лигаси гуруҳ босқичидан ва Европа Лигаси 1/4 финал босқичидан, жорий мавсумда эса ЕЧЛ гуруҳ босқичи ва ЕЛ 1/8 финалга ўтиш ўйинида мағлуб бўлиб, ўз юришини тўхтатди.
Изоҳ (0)