“Тиббиёт ва санитария ходимлари қайта тайёрловдан ўтказилади” — СЭC вабо касаллиги тарқалиши билан боғлиқ ҳолат юзасидан изоҳ берди

Tengrinews 21 февраль куни қўшни Қозоғистон бошқа мамлакатларда вабо тарқалаётгани сабабли чегарада назоратни кучайтиргани ҳақида хабар берди. Маълум қилинишича, касаллик асосан Сурия ва Африка мамлакатларида аниқланмоқда. Ҳолат қанчалик хавфли? Вабо Ўзбекистонга ҳам кириб келиши мумкинми? “Дарё” мухбири Санитария эпидемиологик осойишталик ва жамоат саломатлиги қўмитаси бошқарма бошлиғи Рустамжон Икромовдан республикада касалликни аниқлаш ва унга қарши курашиш бўйича қандай чоралар кўрилаётгани бўйича изоҳ олди.

Рустамжон Икромовнинг айтишича, март—апрель ойларида тиббиёт ва санитария ходимлари вабо профилактикаси бўйича қайта тайёргарликдан ўтказилади.

“Ўзбекистонда ҳам Қозоғистондаги каби тайёргарлик ишларини бошлаш юзасидан Соғлиқни сақлаш вазирлиги буйруғи асосида ҳудудий бошқармаларга тегишли кўрсатма хати юбрилди. Жорий йилнинг март—апрель ойларида республикадаги тиббиёт ходимлари ва чегара кесиб ўтиш жойларидаги санитария назорат пунктлари ходимлари қўмитамизнинг ҳудудлардаги мутахассислари томонидан қайта тайёргарликдан ўтказилади. Хусусан, тиббиёт ходимлари учун семинарлар ташкил этилиши белгиланган. Дарсларда юқумли касалликлар профилактикаси бўйича билимлар берилади. Худди шу каби чегара ўтиш жойларидаги санитария назорат пунктлари мутахассислари ҳам тайёргарликдан ўтказилади. Йил давомида ўта хавфли касалликлар, шу жумладан, давлат чегарасини кесиб ўтган ва вабо касаллигидан гумон қилинган фуқароларга нисбатан эпидемиологик чоралар кўрилади”, — деди у.

Рустамжон Икромов вабо касаллиги ва унинг белгилари ҳақида ҳам гапириб берди.

“Вабо ўткир ичак юқумли касаллиги ҳисобланади. У ўта хавфли бўлиб, жуда кучли диарея ҳолатига олиб келади. Оқибатда инсон организми сувсизланади ва ҳаётий органлар фаолияти бузилади. Бу ўлимга ҳам олиб келиши мумкин. Вабонинг атроф-муҳитда яшовчанлиги мавжуд ва тез тарқалиш эҳтимоли бор. Шу сабабли касалликнинг олдини олиш профилактик йўналишлардан биридир. Иссиқ иқлим кириб келиши ва қишлоқ хўжалиги маҳсулотлари истеъмолининг кўпайиши вабога чалиниш эҳтимолини орттиради. Касалликнинг асосий белгилари: ўткир ичак юқумли касалликлари сингари бирданига ич кетиши, тана ҳароратининг кўтарилиши, қорин бўшлиғидаги оғриқ, иштаҳа йўқолиши ва қайт қилиш. Кучли диарея билан кечадиган касалликка чалинган ҳар бир фуқаро вабога текширилади. Яъни лаборатория текширувлари ўтказилади. Агар вабо аниқланса, махсус чоралар кўрилади. Лекин бизда шу кунгача бундай ҳолат юз бермади”, — деди мутахассис.

Унинг қўшимча қилишича, Ўзбекистонда вабо касаллиги охирги марта ўтган асрнинг 80 йилларида, Қорақалпоғистон ҳудудида аниқланган.