Қашқадарё вилояти Шаҳрисабз туманида ҳоким ёрдамчиси 160 млн сўмдан ортиқ кредит маблағини ўзлаштиргани аниқланди. Бу ҳақда Коррупцияга қарши курашиш агентлиги ахборот хизмати хабар берди.
Хабарга кўра, ҳолат Бош прокуратура ҳузуридаги Иқтисодий жиноятларга қарши курашиш департаментининг Шаҳрисабз тумани бўлими томонидан ўтказилган терговга қадар текширувда аниқланган. “Б.С.Б.” МЧЖ таъсисчиси ва раҳбари А.Ў. бир пайтнинг ўзида туманда маҳаллада ҳоким ёрдамчиси лавозимида ишлаётганидан фойдаланган ҳолда 114 миллион сўм солиқ ва йиғимларни тўлашдан бўйин товлаган.
Шунингдек, тижорат банкининг Шаҳрисабз филиали мансабдор шахслари билан жиноий тил бириктирган ҳолда ҳужжатларни сохталаштириш орқали 162 миллион сўм кредит маблағларини ўзлаштириш йўли билан талон-торож қилгани аниқланган.
Мазкур ҳолат бўйича унга нисбатан Жиноят кодексининг 184-моддаси 2-қисми “б” банди (солиқлар ёки йиғимларни тўлашдан бўйин товлаш), 167-моддаси 3-қисми “а” банди (ўзлаштириш ёки растрата йўли билан талон-торож қилиш) ва 209-моддаси 1-қисми (мансаб сохтакорлиги) билан ҳамда тижорат банкининг Шаҳрисабз филиали мансабдор шахсларига нисбатан 167-моддаси 3-қисми “а” банди ва 228-моддаси 2-қисми “б” банди (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)