Исроил армияси босиб олинган Ғарбий Соҳилдаги Наблусга уюштирган рейдда камида 10 нафар фаластинликни, жумладан 72 ёшли эркак ва 14 ёшли болани ўлдирди. Бу ҳақда Al Jazeera хабар берди.
Фаластин соғлиқни сақлаш вазирлиги Исроил ҳарбийлари томонидан камида 102 киши яралангани, жумладан, 82 киши ўққа тутилганини маълум қилди. Улардан олти нафарининг аҳволи оғир. Исроил армияси 22 февраль куни маҳаллий вақт билан соат 10 да ўнлаб зирҳли техника ва махсус кучлар билан Наблусга бостириб кирган.
Шундан кейин кенг кўламли қарама-қаршиликлар бошланган. Аскарлар қидирувда бўлган икки фаластинлик жангчи Ҳоссам Ислеем ва Муҳаммад Абдулғоний томонидан эгаллаб олинган уйни қуршаб олган, уларнинг иккаласи ҳам ўлдирилган.
2023 йил бошидан бери Исроил кучлари томонидан ўлдирилган фаластинликлар сони ишғол қилинган ҳудудларда 61 кишига етди, улардан 13 нафари болалардир.
“Биз ишғолчиларнинг Наблусга бостириб киришини қоралаймиз ва халқимизга қарши давом этаётган ҳужумларни тўхтатишга чақирамиз”, — деди Фаластин президенти Маҳмуд Аббоснинг матбуот котиби Набиль Абу Рудейне.
Изоҳ (0)