Ўзбекистонда январь ойида сотилган енгил автомобилларнинг умумий сони 118 мингтани ташкил этиб, ўтган йилнинг декабрига нисбатан 18 фоизга ўсди. Бу ҳақда “Дарё”га Иқтисодий тадқиқотлар ва ислоҳотлар маркази маълум қилди.
Унга кўра, автомобиль олди-сотдиси бўйича Самарқандда 85 фоиз, Фарғонада 44 фоиз ва Наманган вилоятларида 31 фоизлик сезиларли ўсиш кузатилди.
2022 йил январь ойига нисбатан енгил автомобиллар савдоси сони деярли 20 фоизга ошди.
Бирламчи бозорда (янги автомобиллар) рўйхатдан олинган автомобиллар сони бир ой ичида 71 фоизга ошди. 2022 йилнинг январь ойига нисбатан бирламчи бозорнинг ўсиши 5,6 фоизни ташкил этди.
Шу билан бирга, йил бошидан буён маҳаллий ишлаб чиқарилган янги автомобиллар савдоси 23,4 мингтани ташкил этиб, 71 фоизга ошди (2022 йил январь ойига нисбатан — 2 фоизга ўсди).
Хорижда ишлаб чиқарилган янги автомобиллар сотуви 2022 йил декабрь ойида 75 фоизга ўсиш билан 2,5 мингтани ташкил этди (2022 йил январига нисбатан ўсиш 60 фоиз).
Жорий йилнинг январь ойида иккиламчи бозорда (эски автомобиллар) 92 мингта автомобиль сотилди, бу ўтган йилнинг декабрь ойига нисбатан 8,9 фоизга кўпдир. 2022 йил январь ойига нисбатан ўсиш 24 фоизни ташкил этди.
Изоҳ (0)