“Украинадан демократик йўлдан қайтмаслик талаб қилинмоқда” — Навбаҳор Имомова АҚШ ёрдамлари эвазига расмий Киевдан нималар кутаётгани ҳақида

“Америка овози” телерадиоси мухбири, журналист Навбаҳор Имомова “Дарё” нашрига берган интервьюсида АҚШнинг Украинага бераётган ёрдамлари ортида қандай шартлар борлиги ҳақида гапирди.  

Навбаҳор Имомованинг айтишича, АҚШнинг Украинага бераётган ёрдамлари эвазига бир қатор шартлари бор.

“Бу шартлар очиқ. Яъни Украина демократик йўлдан қайтмаслиги, ҳукумати ҳисобдор бўлиши керак. Мамлакатда ғарбга хос қарорлар қабул қилиниши лозим, деган шартлар бор. Бу ерда Америка сиёсатчилари бизнинг манфаатлардан келиб чиққан қарорлар қабул қил, демайди, лекин уларнинг назарида Украина аллақачон шундай қарорлар қабул қила олади. Украина ғарбга интилмоқда. Энг муҳими, демократик дунёнинг ажралмас қисмига айланиш ҳаракатида.

Ҳозирги Украина авторитар сиёсат ва диктатура бошқарувларига қарши. Атрофдаги давлатлардан фарқли бир жамиятга, бир тузумга айланмоқчи. Хусусан, Россиядан фарқли бўлишга уриняпти. Ва Россиянинг назорати ва босимларидан қутулишга ҳаракат қилмоқда. Украина узоқ муддатда НАТОга кириши мумкин. Яқин муддатда Европа иттифоқига қўшилиш учун ҳаракатларини қувватлаши керак. НАТО яқин орада Швеция ва Финляндия ҳисобига кенгаяр экан, ундан кейин Украинани олиб кириш ҳаракатлари бўлади. Вашингтонда Украина тарафдорлари, сиёсий доиралар мана шундай тарғибот олиб боради”, – деди журналист.

Навбаҳор Имомованинг қўшимча қилишича, коллектив ғарб томонидан Украинани қайта қуриш ҳақида ҳам кўп гапирилмоқда.

“Украинани қайта қуриш борасида режалар мавжуд. Ғарб бу йўлда янгича “Жорж Маршалл” режаси билан чиқади. “Буни амалга ошириш учун Украина юлғичликка қарши курашиш керак, тизим шаффофланиши, инсон ҳуқуқлари ҳурмат қилиниши, қонун устувор бўлиши керак. Сиёсий органлар бир-биридан мустақил бўлиши лозим. Бунда энг асосий ишни Украина халқининг ўзи қилади. Биз Украина халқини қувватлаймиз. Бу йўлда биз аниқ натижалар кўришимиз керак”, деган талаблар бор. Бу шартлар ҳар куни янграмаса-да, лекин албатта бор”, – деди “Америка овози” мухбири.

Аввалроқ Навбаҳор Имомова АҚШда Байденнинг тандиқчилари – республикачилар Вакиллар палатасида кўпчилик ўринга эга бўлгани сабаб Оқ уй учун Украинага ёрдам таклифларини маъқуллатиш олдингига қараганда қийинлашганини айтганди.