Россия сафарбарликнинг янги тўлқини доирасида университетларнинг кундузги бўлимлари талабаларини оммавий фронтга юборишга тайёрланмоқда. Бу ҳақда Украина Мудофаа вазирлигининг Бош разведка бошқармаси хабар берди.
“Бунинг учун ‘билдириш пунктлари’ номли марказлар яратилмоқда, улар ҳарбий комиссарликларга кундузи ўқийдиган талабаларга чақирув қоғозларини топширишда ёрдам беради”, — дейилади Украина разведкаси баёнотида.
Ушбу маълумотни тасдиқлаш учун украин разведка бошқармаси Томск давлат педагогика университети раҳбариятига тегишли бўлган 9 февралдаги буйруқнинг нусхасини эълон қилди.
Ҳужжатда “билдириш пунктлари” да ишлаш учун маълум миқдордаги талабалар ва ходимларни ажратиш талаби кўрсатилган. Қайд этилишича, муайян талабалар ва ходимлар ўз розилигисиз ёки ҳатто олдиндан огоҳлантиришсиз бундай пунктлар таркибига киритилмоқда.
Новосибирск педагогика университети ва Томск политехника университети ходимлари ҳам худди шундай буйруқларни олган, дейилади Украина ҳарбий разведкаси хабарида.
“Эътиборли томони, Россиядаги навбатдаги сафарбарлик тўлқини қўшимча қонуний асосларни талаб қилмайди, чунки 2022 йил сентябрь ойида эълон қилинган “қисман сафарбарлик” расман якунланмаган. Сафарбарлик 1 апрелгача – баҳорги муддатли ҳарбий хизматга чақирув бошланишидан олдин амалга оширилиши мумкин. Зарур бўлса, эҳтимол, чақирувнинг бошланиши кечиктирилади”, — дея қайд этилган хабарда.
Россияда сафарбарлик 2022 йил сентябрь ойи охирида бошланган ва Россия расмийларига кўра, октябрь ойи охирида тугаган. Бироқ Владимир Путин уни якунлаш тўғрисидаги фармонни ҳали имзолагани йўқ. Январь ойида президент матбуот котиби Дмитрий Песков фармоннинг баъзи бандлари кучда қолишини, чунки сафарбарлик “бошқа чора-тадбирларни ҳам ўз ичига олишини” айтди.
“Қисман сафарбарлик” чора-тадбирлари доирасида Путин университет ва коллежларда кундузги ёки сиртқи бўлимларда ўқиётган ҳамда биринчи марта таълим олаётган талабалар учун сафарбарликни кечиктириш тўғрисидаги фармонни имзолаганди. Шунингдек, таълим муассасаларининг, жумладан, давлат аккредитациясидан ўтган хусусий олий ўқув юртларининг аспирантлари ва кечки бўлимлари талабалари сафарбарликдан озод этилган.
Изоҳ (0)