АҚШ фуқаролари Украинадаги урушнинг “кутилмаган оқибатлари” туфайли Россияга сафардан тийилиши, Россия ҳудудида бўлганлар эса зудлик билан мамлакатни тарк этиши керак. Бу ҳақда Америка элчихонаси сайтида чоп этилган огоҳлантиришда айтилади.
Элчихонанинг қайд этишича, Россия ҳукумати Россияда яшайдиган америкаликларнинг икки фуқаролигини тан олмаслиги, уларни АҚШ консуллик ёрдамидан маҳрум этиши, шунингдек, сафарбарликка жалб қилиши ва мамлакатни тарк этишига тўсқинлик қилиши мумкин.
“Агар Россияни тарк этишни истасангиз, ўзингиз имкон қадар тезроқ ҳаракат қилишингиз керак. АҚШ элчихонаси АҚШ фуқароларига мамлакатни тарк этишга ёрдам беришда жиддий чекловларга эга, транспорт имкониятлари эса кутилмаганда янада чекланиши мумкин”, —дейилади баёнотда.
Бундан ташқари, АҚШ элчихонаси Россиядаги фуқароларига “ҳар қандай сиёсий ёки ижтимоий норозиликлардан сақланишни” ва бундай акцияларда махсус хизматлар ходимларини суратга олмасликни тавсия қилди.
Россиянинг Украинадаги ҳарбий амалиёти бошланганидан бери Американинг Москвадаги элчихонаси ўз фуқароларига Россияни тарк этишни сўраб бир неча бор мурожаат қилди. Охирги марта бундай мурожаат сентябрь ойи охирида, Россияда қисман сафарбарлик бошланганидан кейин эълон қилинди.
Россияда сафарбарлик тадбирлари 21 сентябрдан бошланди. Владимир Путин бу “Россия суверенитети, унинг ҳудудий яхлитлигини ҳимоя қилиш ва халқлар хавфсизлигини таъминлаш учун” зарур эканлигини таъкидлади. 28 октябрь куни Россия мудофаа вазири Сергей Шойгу сафарбарлик тугаганини, кўнгиллиларни хизматга олиш давом этишини маълум қилди.
Изоҳ (0)