Россия президенти Владимир Путин 21 февраль куни Федерал Мажлисга мурожаатида Украинанинг Россия аэродромларига қилган ҳужумига муносабат билдирди. Бу ҳақда “Интерфакс” хабар берди.
“Биламизки, Ғарб Киев режимининг бизнинг стратегик авиация объектларимизга зарба беришга уринишда бевосита иштирок этмоқда. Ҳужум учун фойдаланилган дронлар НАТО мутахассислари ёрдамида жиҳозланиб, модернизация қилинган”, — деди Путин.
Россия президенти Россия ва АҚШ ўртасидаги муносабатлар пасайгани ва бунга Қўшма Штатлар сабабчи эканини таъкидлади.
“АҚШ дунё тартибини фақат ўзи учун ўзгартиришни бошлаганини қабул қилиб бўлмайди”, — деди Владимир Путин.
Владимир Путиннинг Россия Федерал Мажлисига мурожаати
Путин 21 февраль куни Федерал Мажлисга мурожаат қилиб, Украинадаги “махсус ҳарбий операция” давом этишини маълум қилди.
“Бугун мен мамлакатимиз учун оғир даврда гапиряпман. Бутун дунёда орқага қайтарилмас туб ўзгаришлар, мамлакат ва халқ келажагини белгиловчи энг муҳим тарихий воқеалар рўй бермоқда. Ҳар биримиз учун улкан масъулият бор”, — деди Путин.
Бундан ташқари, Россия президенти агар Украинанинг Ғарб иттифоқчилари узоқ масофага учувчи қуролларни кўпроқ етказиб берса, рус ҳарбийлари таҳдидни Россия чегараларидан узоқлаштиришга мажбур бўлишини айтди. Шунингдек, Путин Россияга қарши санкциялар ҳақида гапирар экан, “Ғарбнинг мақсади — россияликларнинг жабр кўриши”, эканини айтди.
Бундан ташқари, сиёсатчи Россия ядровий тўхтатувчи кучларини энг сўнгги тизимлар билан жиҳозлаш даражаси 91,3 фоизни ташкил этишини маълум қилди.
Россия аэродромига ҳужум
26 декабрга ўтар кечаси Россиянинг Саратов вилоятидаги “Энгелс” ҳарбий аэродромида портлашлар содир бўлганди. Россия Мудофаа вазирлиги маълумотига кўра, ҳаво ҳужумидан мудофаа кучлари аэродром узра Украина дронини уриб туширган, унинг қисмлари қулашидан уч нафар аскар ҳалок бўлган. Шундан сўнг Россия аэродромдаги авиатехникаларини бошқа жойга кўчирган.
Британия разведкаси Россия самолётларининг “Энгелс” аэродромидан кўчирилиши Украинага зарба беришда қандай таъсир қилишини прогноз қилди. The New York Times нашри Россия аэродромларидаги портлаш Украина энергетика тизимига ракета зарбалари беришни мураккаблаштириши мумкинлигини маълум қилган.
Изоҳ (0)