Россия иқтисодиёти Украинадаги уруш оқибатида 2026 йилга келиб 190 млрд доллар йўқотади. Бу ҳақда Bloomberg хабар бермоқда.
Уруш бошлангандан бери Ғарб томонидан киритилган санкциялар дастлаб нефть, газ ва қишлоқ хўжалиги маҳсулотлари каби жаҳон бозорлари учун муҳим бўлган Россия экспортини қамраб олмади, аммо сўнгги бир неча ой ичида энергияга баъзи чекловлар қўшилди.
Bloomberg иқтисодчилари 2023 йилда вазият Россия учун янада қийинлашади деб ҳисобламоқда.
Россия ҳукумати нефть даромадлари пасайишининг олдини олиш ва юз минглаб урушга сафарбар қилинган эркаклар оқибатида бўшаб қолган меҳнат бозорини тўлдириш учун курашмоқда.
АҚШ ва унинг иттифоқчилари энергиядан фойдаланиш имкониятини сақлаб қолиш зарурати билан дастлаб юмшоқроқ чекловларни жорий этишга мажбур бўлди.
Россия хом ашё нархининг юқорилиги сабаб Хитой ва Ҳиндистон каби талабгорларга нефть маҳсулотларини чегирмалар билан сотди. Натижада мамлакат даромадлари кўпайди.
Жаҳон ялпи ички маҳсулотининг 30 фоиздан ортиғини ташкил этувчи давлатлар Россия билан савдо алоқаларини сақлаб қолди ва урушни қоралашдан ўзларини тийди, бу Россияга таъминот занжирларини тиклаш ва иқтисодий изоляцияга қарши курашиш имконини берди.
Савдонинг санкциялар қўлламаган мамлакатларга йўналтирилгани ва давлат харажатларининг катта ўсиши Халқаро Валюта Жамғармаси Россияга бу йил ва келгуси йил учун йирик иқтисодиётлар орасида энг катта ўсиш прогнозини берганининг сабабларидан биридир.
Бриоқ, молиявий жиҳатдан муаммолар келгуси йилларда аниқроқ кўринади. Россиянинг меҳнатга лаёқатли аҳолиси келгуси ўн йил ичида 6,5 фоизга қисқариши мумкин. Бу эса иқтисодиётни оғир аҳволга олиб келади.
Изоҳ (0)