Ўтган йили Ўзбекистон мандарин импортини кескин оширди — жисмоний жиҳатдан ушбу маҳсулот импорти ҳажми 63,6 минг тоннага етди, бу 2021 йилга нисбатан 1,8 баробар кўпдир, дея хабар бермоқда EastFruit.
“Коронавирус” туфайли 2020 йилги импорт ҳажми пасайишидан сўнг Ўзбекистон мандарин импортини нафақат тиклади, балки кетма-кет иккинчи йил оширмоқда ҳам.
2022 йили импорт ҳажмининг мутлақ қиймати билан бирга ўсиш суръати ҳам барча рекордларни янгилади.
Қайд этилишича, импортнинг бундай юқори ўсиш суръатлари Ўзбекистоннинг халқаро савдосини либераллаштириш давом этаётгани билан қисман боғлиқдир.
Хусусан, 2022 йилнинг ноябрь ойида цитрус мевалар ва банан импорти учун нол ставкалар қўлланилиши яна бир бор узайтирилди.
“Импорт (олма, банан, киви, цитрус мевалар ва бошқа мевалар импорти) кескин ошишига яна бир сабаб 2021 йили олма ҳосили паст бўлганлиги ва 2021—2022 йиллардаги қиш мавсумида унинг нархи кескин ошгани бўлди. Учинчи сабаб — мамлакат аҳолиси сони жадал ўсиб бораётгани ва Ўзбекистон иқтисодиётининг ўсиш суръатлари давом этаётгани ҳамда 2022 йилда мамлакатга келган хорижликлар сони ошганидир. Тўртинчи сабаб, албатта, озиқ-овқат чакана савдосининг давом этаётган жадал ривожланиши ва бу импорт қилинган мевалар реализациясида энг кучли сабаб ҳисобланади”, — дейди БМТнинг Озиқ-овқат ва қишлоқ хўжалиги ташкилоти инвестицион департаменти иқтисодчиси Андрий Ярмак.
Давлат статистика қўмитаси маълумотларига кўра, 2022 йилда Ўзбекистон бозорига мандариннинг асосий етказиб берувчилари Покистон, Хитой ва Туркия бўлди. Жами импортнинг 96,2 фоизи ушбу мамлакатларнинг умумий улушига тўғри келади:
- Покистон — 51,1 минг тонна (умумий импортнинг 80,3 фоизи);
- Хитой — 5,8 минг тонна (9,1 фоиз);
- Туркия — 4,3 минг тонна (6,8 фоиз);
- Эрон — 778 тонна (1,2 фоиз);
- Миср — 442 тонна (0,7 фоиз);
- Бошқа мамлакатлар — 1,2 минг тонна (1,9 фоиз).
Изоҳ (0)