Февраль ойи ўрталарида Пентагон АҚШ президенти Жо Байденга Аляска устида аниқланган номаълум объект ҳақидаги ҳисоботни тақдим этди, унинг мазмуни “илмий фантастик ҳикояга ўхшарди”, деб ёзмоқда Американинг The Washington Post нашри.
Бу АҚШ ҳарбийлари Хитойнинг жосусликда гумонланган ҳаво шарини уриб туширганидан бир ҳафта ўтиб содир бўлди. Байден билан мудофаа вазири, Бирлашган штаб бошлиқлари раҳбарлари ва АҚШ Шимолий қўмондонлиги директори мулоқот қилган. Улар президентга объектнинг айнан нима эканини ҳозирча аниқлай олмаганини тан олган, аммо бу фуқаролик самолётлари учун хавфли ва разведка учун яратилган бўлиши мумкинлигини, шунинг учун уни ҳар қандай ҳолатда уриб тушириш кераклигини айтган, деб ёзади WP. Байден рози бўлган ва 10 февраль куни ҳаводаги объект қирувчи ракета билан уриб туширилган.
Кейинги бир неча кун ичида ҳарбийлар Байденга Шимолий Америка осмонида янги учар объектлар пайдо бўлгани ҳақида хабар берди ва АҚШ президентининг розилигини олган ҳолда уларни уриб туширишни маслаҳат берди. WP бу кунлар ғайриоддий ва сюрреалистик бўлганини таъкидлади, чунки Байден аслида сирли нишонларга зарба бериш-бермаслик тўғрисида қарор қабул қилишга мажбур эди, шу билан бирга, мамлакат ҳукумати уларни бевосита номаълум учар жисмлар — НУЖ деб атамасликка ҳаракат қилган, чунки бу атама ўзга сайёраликлар ҳаёти ҳақида ҳазилларни келтириб чиқаради. Оқ уй эса ҳеч қандай ўзга сайёраликлар ҳаракатларининг белгиси йўқлигига ишонтириши зарур эди.
Аввалига АҚШ расмийлари ҳаво шарларини Хитойнинг жосуслик дастури билан боғлади, бироқ 16 февраль куни Байден бу назарияни тасдиқловчи маълумотлар йўқлигини таъкидлади. “Катта эҳтимол билан шарлар об-ҳавони ўрганувчи ёки бошқа илмий тадқиқотлар олиб борувчи хусусий фирма ва тадқиқот институтларига тегишли бўлган”, — деди АҚШ президенти.
У фуқаро авиацияси учун хавфли бўлган объектларни уриб тушириш тўғрисидаги қарори учун узр сўрамаслигини ва бу шарлар “сезгир объектлар”ни кузатаётгани ҳақидаги тахминни инкор этиб бўлмаслигини таъкидлади.
Изоҳ (0)