АҚШ Ҳарбий-ҳаво кучларининг F-16 қирувчиси Канада билан чегарадаги Гурон кўли устида номаълум учар объектни уриб туширди, деб хабар бермоқда The New York Times.
Пентагон маълумотларига кўра, учар аппаратни биринчи марта 11 февраль, шанба куни Монтана штати осмонида пайқашган. Якшанба куни у Висконсин ва Мичиганда кузатилган. Объект Гурон кўлидан тахминан олти минг метр баландликда пайти Жо Байденнинг буйруғи билан уриб туширилди. АҚШ расмийларига кўра, объект саккиз бурчакли тузилма бўлиб, фуқаро авиацияси учун потенциал хавф туғдирган.
Бу февраль ойининг бошидан бери АҚШ ва Канада осмонида уриб туширилган тўртинчи объект. 4 февраль куни АҚШ ҳарбийлари Атлантика океани узра Хитойга тегишли “тадқиқот” шарини уриб туширди. АҚШ Давлат департаменти шар электрон разведка ускуналари билан жиҳозлангани ва Хитой разведка дастурининг бир қисми эканини даъво қилди.
10 февраль куни Аляска осмонида номаълум объект уриб туширилди, эртаси куни Канада ҳаво ҳудудида ҳам яна бир шундай объект уриб туширилди. Шимолий Америка ҳаво ҳужумидан мудофаа қўмондонлиги раҳбари, америкалик генерал Глен ван Херк журналистларга Шимолий Америка осмонида уриб туширилган жисмлар Ер атмосферасига ташқаридан келиб қолгани эҳтимолини истисно қилмаслигини айтди. Бироқ, кейинчалик АҚШ президенти маъмурияти бундай фикрларни рад этди.
Изоҳ (0)