16 февралга ўтар кечаси Россия Украинага ракета ва учувчисиз учоқлар ёрдамида “аралаш ҳужум” уюштирди. Бу ҳақда Украинанинг “Жануб” Қуролли кучлари оператив қўмондонлиги матбуот котиби Наталья Гуменюк маълум қилди.
Хусусан, Гуменякнинг сўзларига кўра, рус қўшинлари саккизта “Калибр” ракетасини учирган. Барча ракеталар — олтитаси Николаев вилояти, иккитаси Херсон вилояти устида уриб туширилган.
“Афсуски, шу билан бир қаторда душман мағлубиятнинг бошқа усулларини ҳам қўллади – бу аралаш ҳужум эди, хусусан, дрон ва стратегик самолётлар ёрдамида амалга оширилди. Львов вилоятида зарбалар айрим нишонларга тегган”, — деди у.
Украина президент офисининг раҳбари Андрей Ермак Россия қўшинлари “тактикасини бироз ўзгартирганини” айтди. “Улар сохта нишонлардан фойдаланган ҳолда фаол разведка ишларини олиб бормоқда”, — деб ёзган Ермак Telegram’да. Шу билан бирга у Украина ҳаво мудофааси “душман ракеталари ва дронларининг аксариятига дош бера олишини” таъкидлаган.
Львов вилояти раҳбари Максим Козицкийнинг маълум қилишича, ҳужум оқибатида вилоятда муҳим инфратузилма объекти зарар кўрган, ёнғин содир бўлган. Жабрланганлар ва қурбонлар йўқ, деб ёзди Козицкий Telegram’да ва тафсилотларни кейинроқ ёритишга ваъда берди.
Ермакнинг сўзларига кўра, ҳужумдан нафақат Львов вилояти, бошқа ҳудудлар ҳам жабр кўрган. “Украинанинг шимоли, ғарбий қисми, шунингдек, Днепрбўйи ва Кировоград вилоятларига зарбалар берилди”, деди Украина президенти офисининг раҳбари. У етказилган зарар миқдорига аниқлик киритмади.
Октябрь ойининг бошидан бери Россия армияси Украина ҳудудига мунтазам равишда ракеталар ва Эронда ишлаб чиқарилган дронлар билан оммавий зарбалар бериб келмоқда. Бундай зарбаларнинг нишони кўпинча энергия инфратузилмаси объектлари бўлиб чиқади. Украина энергетика тизимида қувват етишмаслиги сабабли бир неча ойлардан буён барча ҳудудларда ҳам режали, ҳам фавқулодда электр энергиясини ўчириш кузатилмоқда.
Изоҳ (0)