“Ҳамма шовқин ҳам мусиқа бўлавермайди”. Шуҳрат Дарё бақириб куйлаётган ва гитарани “уриб” чалаётган ҳамкасблари ҳақида (видео) 

Хонанда Шуҳрат Дарё “Дарё” интернет нашрининг YouTube'даги каналига берган интервьюсида бахтни бойликда деб билмаслиги, ҳаётдаги ягона армони ва баъзи хонандалар  ижодига эътирози борлиги ҳақида айтиб ўтди.

— Санъаткор бўлганимдан жуда мамнунман. Моддий аҳволимдан ҳам шикоят қилмайман. Назаримда, инсон бахти фақатгина бойлик билан боғлиқ эмас. Дўстларимнинг орасида шоир ва ёзувчилар жуда кўп. Зиёли инсонлар даврасида юрганим, ҳамсуҳбат бўлганим ҳам катта бойлик. Инсон бадавлат бўлиб, ҳашамат ичида яшаса-ю, маънавий жиҳатдан қашшоқ бўлса бу ҳам оғриқли мавзу, — дейди хонанда Шуҳрат Дарё.

Хонанда буютма шеърлар ёздирмаслиги ва қўшиқ яратишда асосан китоблардан фойдаланишининг сабабини қуйидагича изоҳлади.

— Қўшиқ шеърига ниҳоятда талабчанман. Яхши шеърга куй басталаш ҳам осон кечади. Айрим хонандалар шоирларнинг шеърлари куйга тушмаслиги сабаб, махсус ёздиришлари ҳақида айтиб қолишади. Билмадим, менинг услубим ундай эмас. Асосан шеърий китоблардан фойдаланаман. Сабаби у китоб бўлгунига қадар, тақризчи, муҳаррир ва мусаҳҳиҳларнинг қўлидан ўтган. Аммо баъзан тасодиф сабаб учратиб қолинган шеърлар ҳам бўлади. Ўтган йили интернетда бир видеороликни кўриб қолдим. Унда чиройли шеърни ўқишган экан. Бир тинглагандаёқ шеър маъқул бўлди. Унинг матнини тополмадим, шундан сўнг эшитиб қоғозга кўчириб олдим. Жуда чиройли қўшиқ яралди. “Йил аёли” номли танловда ижро этишимни сўрашди. Яхши шоирлар кўп, фақат кўп ҳолларда уларнинг ижоди тарғибот қилинмайди. Чиқарилган шеърий китоблар тарғиботига ҳам кам эътибор берилади, — дейди хонанда Шуҳрат Дарё.

Хонанда Шуҳрат Дарё Жаноб Расул ижодига эътироз билдирди. Бундан ташқари, гитарани ҳам нозик чертиш кераклиги ҳақида ёш хонандаларга ўз тавсияларини берди.

— “Лабингдаги помада, йигитинг йўқ чамамда” деб бақириб қўшиқ айтса, зўр айтаётгандек туюлади. Телевизорда “Агар ошиқлиғим айтсам, куйиб жон-у, жаҳон ўртар” деб бирорта мумтоз қўшиқлар эфирга берилса, айрим ёшлар “Дада сизнинг ашулангиз чиқди”, деб секингина бошқа телеканалга олиб қўяди. Хорижлик тингловчилар учун ўзбек мумтоз қўшиқлари қизиқ. Аммо халқимиз учун... Ваҳоланки, тўйларда айтилаётган хориж мусиқаларининг ватанини суриштириб борса уларнинг тарихи минг йилга ҳам бормайди. Уларнинг мумтоз қўшиқлари ҳам йўқ. Афсуски, оммавий маданиятга эргашиш ва тингловчи дидини шакллантиришда ўзбек хонандаларининг ҳиссаси катта. “Шунақасини яхши эшитишяпти-ю, бўлаверади”, деб дуч келган мусиқага матнни қўйиб айтаверса, оқибати яхши бўлмайди.
Кейинги пайтларда гитара жўрлигида қўшиқ айтиш ҳам урфга айланди. Аммо баъзи хонандаларнинг гитарага қўпол муносабатда бўлиб, жазава билан уни чалишлари ғашимни келтиради. Хорижликлар буни кўришса устимиздан кулишади. Чунки гитара ҳам сеҳрли соз, уни ҳам нозиклик билан чалиш керак. Ҳамма шовқин ҳам мусиқа бўлавермайди, — дейди хонанда Шуҳрат Дарё.

Шуҳрат Дарё ҳаётдаги ягона армони ҳақида кўзига ёш олиб гапирди. 

— Отамни Маккага етаклаб олиб боролмаганман, фақатгина шундай армон қиламан. Насиб қилса, онамни муқаддас шаҳарларга олиб боришни ният қиляпман. Фарзанд бўлиб онамнинг барча орзуларини ушалтиришни ва ҳамиша хизматларида бўлишни орзу қиламан, — дейди хонанда Шуҳрат Дарё.

Хонанда билан суҳбатни тўлиқ қуйида томоша қилишингиз мумкин.